पूँजी बजारबाट १० लाख बढी लगानीकर्ता पलायन, निष्क्रिय खाता बन्द गर्ने योजनामा नियामक

काठमाण्डौ । पछिल्लापटक पूँजीबजार सुस्ताउँँदा ठूलो संख्यामा लगानीकर्ता  पलायन भएका छन् ।  

हरेक बुलमा सेयर बजारमा रौनक छाउँदा विद्यार्थी, व्यवसायीदेखि गृहिणीसम्मको उपस्थिति बजारमा उल्लेखनीय रुपमा देख्न पाइन्छ । तर बजार सुस्ताउँदा भने यस्तो संख्या क्रमशः घट्ने गर्छ ।  

हाल सीडीएससीको डिम्याट र 'मेरो सेयर'को संख्याको फरक नियाल्दा पूँजी बजारबाट लगानीकर्ता पलायन भएको प्रष्टै देखिन्छ ।  

सीडीएसीको तथ्यांकअनुसार हाल पूँजी बजारमा करिब ६५ लाख डिम्याट खाता रहेका छन् भने ५५ लाख २८ हजार ७२० मेरो सेयरको संख्या रहेको छ । पूँजी बजारमा रौनक छाउँदा यो संख्या ह्वात्तै बढेको थियो । तर हाल सक्रिय 'मेरो सेयर' प्रयोगकर्ताको संख्या जम्मा ३६ लाख ७८ हजार १५४ रहेको छ ।  

यस हिसाबले हेर्दा हाल 'मेरो सेयर'मा नै झण्डै १० लाख बढी खाता निष्क्रिय अवस्थामा छन् । यो संख्याले पूँजी बजारमा कुनै समय सक्रिय भएका लगानीकर्ता कुनै न कुनै हिसाबले पलायन भएको हुनसक्ने संकेत गरेको सीडीएसीका प्रवक्ता सुरेश न्यौपानेले बताए । 

उनका अनुसार डिम्याट संख्या झण्डै  ६५ लाख पुग्नुमा सबै लगानीकर्ताहरुमा यो अनिवार्य भएको कारण नै हो । 

‘सेयर कारोबार गर्न डिम्याट खाता अनिबार्य गरिएका कारण सबैले डिम्याट खाता खोल्दा झण्डै ६५ लाख संख्या पुगेको हो,’ उनले भने, ‘तर हालसम्म पनि 'मेरो सेयर' सबैका लागि अनिवार्य गरिएको छैन । अहिले पनि करिब ५ प्रतिशतले कागजी रुपमा आईपीओमा आवेदन दिन र डीआइएस गर्न सक्छन् ।’  

'मेरो सेयर'को संख्यामा देखिएको फरकले भने पूँजीबजारबाट लगानीकर्ता अन्य व्यवसाय वा विदेश पनि पलायन भएकोे हुन सक्ने  उनले बताए । अब सेयर नै नभएको खाता भने नियामकले क्रमशः बन्द गर्दै जाने विषयमा सोच्नुपर्ने बेला आएको पनि न्यौपानेले बताए ।