चितवन । जग्गाको कित्ताकाट सम्बन्धमा केन्द्र सरकारले गरेको निर्णय आफ्नो क्षेत्रमा लागू गर्न नसकिने चितवनको भरतपुर महानगरपालिकाले प्रष्ट्याएको छ ।

जग्गाको वर्गीकरणका आधारमा जग्गाको अंशबण्डा, किनबेच, प्लटिङको मापदण्ड स्थानीय तहले नै बनाउने उल्लेख गरिएको नीति अनुसार भरतपुरमा थप गृह कार्य गर्न आवश्यक रहेको भन्दै जग्गा कित्ताकाटमा पूर्ण बन्देज यथावत रहने महानगरपालिकाले प्रष्ट्याएको छ ।

जग्गाको कित्ताकाट निर्णय भएसगैँ भरतपुरमा मनपरी तवरले भू माफियाहरु सल्बलाएका कारण आफूहरुले स्पष्ट कार्ययोजना बनाएर मात्रै जग्गाको कित्ताकाट लागू गर्ने भरतपुर महानगरकी मेयर रेनु दाहालले जानकारी दिईन् । 

विगतमा चितवनको भरतपुरमा मनपरी तवरले जग्गाको कित्ताकाट हुदाँ समस्या आएको सबैलाई थाहा भएकै कुरा हो। स्मार्ट सिटी बनाउने भनेर तथ्याकं संकलन कार्य जारी छ । कृषियोग्य जग्गा नै जग्गा प्लटिगं भएका छन् । अब नीति बनेपछि मात्रै खुल्नेछ । अब मनपरी चल्दैन् । दाहालले भनिन् । 

भरतपुरमा मात्र अव्यवस्थित तवरले प्लटिगं भएका कारण झण्डै २० प्रतिशत कृषि योग्य जमिन नासिएको कृषि कार्यालयको तथ्याकं छ । यो क्रम दिनदिनै बढेको छ ।

भरतपुरमा मनपरी तवरले पैसा खुवाएर जथभावी प्लटिगं भने तीव्र रुपमा भईरहेकोले यस्ता कार्यलाई रोक्न आफूहरुले बाध्यता भए जग्गा कित्ताकाट नखुलाउने निर्णय गरेको उनले स्पष्ट पारिन् । 
 
प्लटिङ गरी खेतियोग्य जग्गामा कित्ताकाट गरी घडेरीको रुपमा बिक्री वितरण गर्ने आएमा पास नगर्न सम्बन्धित निकायलाई  समेत भनिए पनि भरतपुरम यो क्रम बढेपछि आफूले यस्तो निर्णय गर्नुपरेको उनको भनाई थियो ।

अव्यस्थित प्लटिगंकै कारण चितवनमा भरतपुर विमानस्थल विस्तारमा समेत समस्या आएको छ । अन्य विकासे पूर्वधारका लागि जग्गा पाउन समेत समस्या भईरहेको छ । 

साढे एक बर्षअघि भएको जग्गाको कित्ताकाट नेपाल सरकारले पुस २७ गतेबाट तत्काल लागू हुने गरी खुला गरेको थियो । 

जग्गा खण्डिकरण रोक्ने उद्देश्यले २६ साउन २०७४ कित्ताकाट खारेज सम्बन्धी निर्णय भूमि व्यवस्था मन्त्रालयले हटाएको थियो।

२ फागुन ०७३ मा सर्वोच्च अदालतले भूमिको बर्गीकरण र उपयोग सम्बन्धी कानुनको तर्जुमा भइरहेकोले कृषियोग्य जग्गा विनाश हुनबाट रोक्न आदेश जारी गरेको थियो।

सोही आदेशअनुसार तत्कालीन भूमिसुधारमन्त्री गोपाल दहितले २६ साउन २०७४ मा कित्ताकाट रोकेका थिए।