काठमाण्डौ । चिनियाँ कम्यूनिष्ट पार्टी ‘चेन्दु’का सचिव टाङ्ग लियाङ्ग चीले चन्द्रागिरी केबलकारको अनौपचारिक भ्रमण गरेका छन् । 

चीको नेतृत्वमा आएको चिनियाँ टोलीलाई चन्द्रागिरी हिल्स लिमिटेडका अध्यक्ष चन्द्रप्रसाद ढकाल र महाप्रवन्धक अभिषेकविक्रम शाहले स्वागत गरेका थिए । 

सो टोलीमा चीनको स्वशासित क्षेत्र तिब्बत पिपुल्स कंग्रेस(संसद्)का अध्यक्ष बाई माचिलिन र सिनो हाइड्रोका वरिष्ठ इञ्जिनियर फाग जुन लगायत दूई दर्जन चिनियाँ विशिष्ट व्यक्तित्वहरुको सहभागिता  थियो । 

अनौपचारिक भ्रमणमा आएको चिनियाँ टोलीलाई अध्यक्ष ढकालले चन्द्रागिरीमा निर्माण भएको पूूर्वाधारहरुको बारेमा जानकारी दिँदै चीन नेपालको नजिकको छिमेकी मित्र राष्ट्र भएको र पछिल्लो समयमा चीनले हासिल गरेको आर्थिक समृद्वि र त्यसबाट सिर्जित अवसरहरुको सदुपयोग नेपालको निजी क्षेत्रले गर्नसक्ने विश्वास व्यक्त गरे । चिनियाँ कम्युनिष्ट पार्टी ‘चेन्दु’ का सचिव चीले ‘ चन्द्रागिरीमा निर्माण भएको एकीकृत पर्यटकीय गन्तब्यबाट आफूू अत्यन्तै प्रभावित भएको र यस्तै अन्य परियोजनाहरुको निर्माण हुने हो भने नेपालको आर्थिक विकासले छोटै समयमा तीब्रता पाउने विश्वास व्यक्त गरेका ढकालले बताए । 

यसअघि चेन्दुका मेयर समेत रहेका टाङ्ग लियाङ्ग ची काठमाडौं महानगरपालिका र चीनको सिचुवान प्रान्तको सदरमुकाम चेन्दुबीच भगिनी सहरको सम्बन्ध स्थापनाका लागि सम्झौतापत्रमा हस्ताक्षर गर्न गत शुक्रबार नेपाल भ्रमणमा आएका थिए । 

काठमाडौंको दक्षिण–पश्चिममा अवस्थित चन्द्रागिरी डाँडा धार्मिक, ऐतिहासिक र पर्यटकीय दृष्टिले महत्वपूर्ण मानिन्छ । नेपालको आन्तरिक पर्यटनलाई प्रवद्र्धन गर्ने एवं बाह्य पर्यटकहरुको नेपाल बसाईलाई लम्ब्याउने उद्देश्यले यस डाँडामा चन्द्रागिरी हिल्स लिमिटेड स्थापना भएको हो । समुद्री सतहबाट करिव १, ५०० मिटरको उचाईंमा रहेको चन्द्रागिरी फेदीबाट केबलकार चढेर २,५५१ मिटरको उचाईंमा अवस्थित ‘भालेश्वर महादेव’ को दर्शन गर्न सकिन्छ । म्यानुअल बाल उद्यान, भ्यु टावर रेष्टुरेन्ट र बहुउद्देश्यीय हलसहित निर्माण गरिएको चन्द्रागिरी डाँडाबाट राजधानी सहर, सगरमाथादेखि पश्चिममा काञ्जिरोवा हिमाल एवं अन्य हिमश्रृङ्खलासहित सिन्धुपाल्चोक, नुवाकोट, रसुवा, गोरखा, तनहुँ, मकवानपुर, चितवनका पहाडी क्षेत्रसमेत देख्न सकिन्छ भने चन्द्रागिरी डाँडाको दक्षिणी भेगका टिस्टुङ्ग, फाकेल, चित्लाङका रमणीय गाउँहरू स्पष्ट रूपमा नियाल्न सकिन्छ ।  अपांङ्गमैत्री भौतिक संरचना यहाँको अर्को विशेषता हो । 

गत साउन २४ गतेबाट व्यवसायिक संचालनमा आएको चन्द्रागिरी केबलकारको प्रधानमन्त्री पुष्पकमल दाहाल ‘प्रचण्ड’ले यही मंसिर ३० गते उद्घाटन गरेका थिए । 

विश्वविख्यात केबलकार निर्माता अष्ट्रियन कम्पनी डोप्लमेयरको प्रविधिजडित चन्द्रागिरी केबलकारले प्रतिघण्टा एकहजारजनासम्म यात्रु बोक्ने क्षमता राख्छन् । केबलकार संचालनमा आएदेखि २०७३ मंसिर मसान्तसम्म २ लाख २५ हजार जनाले केबलकारको यात्रा गरेर भालेश्वर माहादेवको दर्शन गरिसकेका चन्द्रागिरी हिल्सका मार्केटिंग म्यानेजर विख्यातबिक्रम साहले जनाएका छन् ।