राम मन्दिर ट्रस्टबाट भारत सरकारले प्राप्त गर्यो करिब ४ सय करोड भारु, कुम्भमेलामा १.२६ करोडले गरे दर्शन

काठमाण्डौ । अयोध्याको राम मन्दिर ट्रस्टबाट भारत सरकारले करिब ४ सय करोड भारुबराबरको कर प्राप्त गरेको छ । आइतबार उत्तर प्रदेशको अयोध्यास्थित मणिराम छावनी मन्दिरमा राम मन्दिर ट्रस्टका ट्रस्टीहरूको बैठक बसेको थियो । जसमा ट्रस्टको लेखाजोखा प्रस्तुत गरिएको थियो ।

यो ट्रस्टको स्थापना सन् २०२० फेब्रुअरी ५ मा भएको थियो। राम मन्दिर ट्रस्टका सचिव चम्पत राईले ट्रस्टले फेब्रुअरी ५, २०२० देखि फेब्रुअरी ५, २०२५ सम्म सरकारलाई करिब ४०० करोड भारु तिरेको बताए ।  

यसमध्ये २७० करोड भारु जीएसटीको रूपमा दिइएको छ भने बाँकी १३० करोड रुपैयाँ अन्य करका रूपमा सरकारलाई दिइएको छ।  उनले अयोध्या आउने भक्तजनको संख्यामा उल्लेख्य वृद्धि भएको बताए । गत वर्ष करिब पाँच करोड भक्तजनले राम मन्दिरको दर्शन गरेका थिए ।

कुम्भमेला २०२५ को समयमा, १५ जनवरी २०२५ र २८ फेब्रुअरीको बीचमा लगभग १ करोड २६ लाख भक्तहरू अयोध्या पुगेका थिए।  यस अवधिमा दैनिक चारदेखि साढे चार लाख मानिस अयोध्या आउने गरेका थिए । यस्तै हरेक दिन १० वटा रेलले ४० हजारदेखि ५० हजार मानिसलाई अयोध्या ल्याउने गरेको जनाइएको छ ।

चम्पत राईले ट्रस्टको वित्तीय अभिलेखलाई नियन्त्रक तथा महालेखा परीक्षक (क्याग) का अधिकारीले लेखापरीक्षण गरेको बताए । करिब ६ महिनाअघि क्यागका अधिकारीहरूलाई पनि अयोध्याको आर्थिक विश्लेषण गर्न आग्रह गरिएको थियो।