नेको इन्स्योरेन्सको हकप्रद सेयर बाँडफाँड ,रकम फिर्ता भुक्तानी वैशाख ३ गतेदेखि

काठमाण्डौ । नेको इन्स्योरेन्स कम्पनी लिमिटेडले निष्कासन गरेको हकप्रद सेयर बाँडफाँड भएको छ । कम्पनीले गत फागुन ८ गतेदेखि चैत १४ गतेसम्म निष्कासन गरेको हकप्रद सेयरको बाँडफाँड चैत ३१ गते भएको हो ।  

कम्पनीले गत माघ १७ गतेसम्म कायम साविकका सेयरधनीहरुका लागि हाल कायम चुक्तापूँजी २ अर्ब १ करोड २३ लाख रुपैयाँबराबरको १ः०.२५ अनुपातमा रु.१०० अंकित दरका ५० लाख ३० हजार ९०१.५५ कित्ता हकप्रद निष्कासन गरेको थियो ।  

उक्त हकप्रदमा रितपूर्वक आवेदन दिने सेयरधनीहरुलाई ४८ लाख ५ हजार ६४०.२० कित्ता हकप्रद सेयर बाँडफाँड भएको हकप्रद निष्कासन तथा बिक्री प्रबन्धक सानिमा क्यापिटलले जनाएको छ । यस हिसाबले कम्पनीको २ लाख २५ हजार २६१.३५ कित्ता हकप्रद सेयर अवितरित रहेको छ ।  

आफ्नो हकभन्दा बढी सेयर माग गरी दरखास्त दिने आवेदकहरुको हकमा बाँडफाँडमा नपरेको हकप्रदबाहेकको रकम वैशाख ३ गतेदेखि फिर्ता भुक्तानी गरिने कम्पनीले जनाएको छ ।