‘इलिअट वेभ र पेष्टल’ मार्फत नियाल्दा अबको बजारको सम्भावना कस्तो ? (साप्ताहिक विश्लेषणसहित )

काठमाण्डौ । यो साता सेयर बजारमा ४ दिन कारोबार भयो । अघिल्लो साता पनि सेयर बजारमा ४ दिन नै  कारोबार भएको थियो । यो साता ४ दिनको कारोबारमा बजार  ३ दिन बढ्यो भने १ दिन मात्रै घट्यो । अघिल्लो साता २ हजार ६७०.७० विन्दुमा बन्द भएको बजार यो साता २ हजार ७२२.७३ विन्दुमा बन्द भयो ।

यस हिसाबले यो साता ५२.०३ अंकले सेयर बजारमा सुधार आयो । अघिल्लो साता नेप्से परिसूचक ३२.६९ अंकले घटेको थियो । यो साता दोस्रो बजारमा ४ दिन कारोबारमा ३२ अर्ब ८८ करोडबराबरको सेयर कारोबार भयो । अघिल्लो साता भने बजारमा २१ अर्ब ९ करोडबराबरको सेयर कारोबार भएको थियो ।  

यस हिसाबले यो साता दोस्रो बजारमा नेप्से परिसूचक र दैनिक औषत कारोबार दुबैमा सुधार आयो । यो साता बजार पूँजीकरण ४५ खर्ब २६ अर्बबराबरको कारोबार भयो । अघिल्लो साता बजार पूँजीकरण ४४ खर्ब ३९ अर्ब रहेको  थियो  ।  यस हिसाबले यो साता बजार बढ्दा लगानीकर्ताको सम्पत्ति ८७ अर्बले बढ्यो ।  

पेस्टल विश्लेषण (pestle )

पेस्टल विश्लेषण भनेको वर्तमान समयको पूँजी बजारमा राजनीतिक, आर्थिक, सामाजिक, वातावरण, कानूनी विषय र प्रविधिको विश्लेषण हो । जसमा राजनीतिमा सरकारको नीति तथा नियम, नेतृत्व विश्लेषण गरिन्छ । अहिलेको अवस्थामा दुई ठूला दलको सरकारलाई मजबुत मान्नु पर्छ ।  

त्यसैगरि, आर्थिक विषयमा मुद्रास्फीति तथा ब्याजदर, देशको आर्थिक वृद्धि तथा रोजगार पर्ने गर्छ । राष्ट्र बैंकको तथ्यांकअनुसार ब्यालेन्स अफ पेमेन्ट , विदेशी मुद्राको प्रयाप्त मात्रामा देखिन्छ ।  

सामाजिक तत्वमा उमेर समूह र जनसंख्या पर्छ । जसमा अहिलेको पूँजीबजारमा युवाको आकर्षणलाई लिन सकिन्छ । जसमा ६६ लाख डिम्याट खाता पुग्नु सकारात्मक विषय हो । त्यसैगरि, प्रविधिमा टिएमएस तथा मेरो सेयर जस्ता प्रविधिको विकासलाई लिन सकिन्छ । कानूनि रुपमा हेर्दा केही लगानीकर्ताहरुले नरुचाएका नीतिमा संसोधन हुन आवश्यक देखिन्छ । यसरी समग्रमा पेष्टल मार्फत अहिलेको पूँजी बजारलाई नियाल्दा सबै विषय सकारात्मक देखिन्छ ।  

तर केही नीतिगत रुपमा सुधार गरेर लगानीकर्ताको मनोबल उकास्न सकेमा कुनै दिन एकै दिन ३० अर्ब कारोबार भएको पूँजीबजारमा ५० अर्ब सम्मको कारोबार सामान्य हुन सक्छ । जसले सरकारको राजश्वमा पनि उल्लेखनिय सुधार आउन सक्छ ।  

प्राविधिक पक्षः  

इलिअट वेभको आधारमाः

इलिअट वेभमा विभिन्न डिग्रीहरु हुने गर्छन् । त्यस्ता डिग्रीहरुले सानाठूला गरेर एकदिनदेखि एकसय वर्षसम्मको समय अवधिलाई प्रतिनिधित्व गर्छन् । इलिअट वेभमा मूल्य माथि जान पाँच फरक–फरक वेभ हुन्छन् भने तल जान ३ वेभ हुन्छन् ।  

माथि लाग्ने पाँच वेभमा पनि तीनवटा बढोत्तरीका र २ वटा सुधारका देख्न सकिन्छ । यसमा १, ३, ५ बढोत्तरीको हुन्छ भने २ र ४ मा करेक्सनको हुन्छ । वेभ ५ को करेक्सन वेभ ‘ए’ हो । वेभ ‘ए’, ‘बी’, ‘सी’ले मूल्य तथा सूचक तल जाने संकेत दिन्छ ।

पछिल्लो बजारलाई १८ सयको विन्दुदेखि ३ हजारसम्म लगानीकर्ताको मनोविज्ञान, बजारले बनाएको चक्र, भोल्युम तथा कारोबार रकम समेतको आधारमा हेर्दा हालको करेक्सन चौथौं वेभको करेक्सन भएको र अब पाँचौ वेभमा बजारले हालसम्म कै उच्च विन्दुलाई पनि ब्रेक गरेर कम्तिमा ३५ सय भन्दा माथि नै हुन्छ भन्ने हाम्रो बिश्लेषण हो ।  

जस अनुसार १८ सय देखि २२ सय सम्म वेभ १ , २२ सय देखि १८६० सम्म वेभ २ , त्यसपछिको बढोत्तरीमा बजार ३ हजार सम्म पुगेको थियो । ३ हजारबाट २४६० सम्म वेभ ४ बनाएरको बजारले अब वेभ पाँच बनाउँदै गरेको देखिन्छ । यस हिसाबले अब वेभ १ बराबर वेभ ५ हुन्छ भन्ने सिद्धान्तलाई आधार मान्ने हो भने पनि बजारले एकपटक अल्ट टाइम हाई बनाउन सक्ने देखिन्छ । जसलाई आधारभूत रुपमा राष्ट्र बैंकको त्थयांकले पनि थप स्पष्ट गरेको छ ।  

सुपर ट्रेण्डः  

सुपर ट्रेण्डमा यदि मूल्य रेखाहरु ट्रेण्डलाईन भन्दा माथि चलेमा बजार बुलिस र ट्रेण्डलाईन भन्दा तल रहेमा वियरिस भन्ने बुझिन्छ । यो साता बजार सुपर ट्रेण्ड भन्दा तल नै चलेको छ । अर्थात सुपर ट्रेण्डको रंग रातो नै रहेको छ । यसले यो साता बजार २७३५ विन्दुमा प्रतिरोध सामना गरेको छ । यस हिसाबले यदि आगामी साता बजार २०३५ विन्दुभन्दा माथि लागेमा अप ट्रेण्ड लिन सक्छ ।  

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – ३२३८

प्रतिरोध २ – ३०८३

प्रतिरोध १–  २८८८

पिभट् प्वइन्टः २७३४

घटेमा सपोर्ट  

सपोर्ट १– २५३८

सपोर्ट २– २३८४

सपोर्ट  ३ –२१८८

निष्कर्षः यो साता सेयर बजारमा ५२ अंकको सुधार आयो । अघिल्लो साता बजार ३२.६९ अंकले घटेको थियो । यो साता सेयर बजारमा कारोबार र सूचक दुबैमा बढोत्तरी आयो । खासगरि, यो साता चैत्र माहिनाको दबाब सकिएसँगै बजारमा सुधार देखिएको हो । प्राविधिक रुपमा यो साताको बजार ५० दिने मूभिङ एभरेज भन्दा माथि लागेको छ भने सुपर ट्रेन्डबाट नियाल्दा यो साता बजारले २७३५ विन्दुमा प्रतिरोध सामना गरेको छ ।  

यो साता कारोबार र भोल्युम दुबैमा बढोत्तरी आयो । आरएसआई र मनी फ्लो इन्डेक्सबाट नियाल्दा बजारले ओभर सोल्ड जोनबाट फर्केको देखिन्छ । यस हिसाबले हेर्दा यो साताबाट सुधार लिएको बजारले आगामी साता पनि निरन्तरता पाउन सक्ने देखिन्छ । यसका लागि बजार पिभट् प्वइन्ट २७३५ विन्दुभन्दा माथि टिकेर कारोबार हुनु पर्नेछ । क्षेत्रगत रुपमा नियाल्दा बजारले यो साता कारोबार र अन्य समूहबाहेक सबै समूहमा हरियाली छायो ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।