_New.gif)
.gif)
.jpg)
काठमाण्डौ । छनौट तथा सिफारिस समितिले तय गरेको कार्यविधिको अक्षरंश पालना हुने हो भने सानो त्रुटीका कारण यसपटक नेपाल धितोपत्र बोर्ड(सेबोन)को अध्यक्षका लागि आवेदन दिएका केही आशालाग्दा उम्मेद्वारहरु अयोग्य बन्नसक्ने देखिएको छ ।
धितोपत्र बोर्ड भित्रैबाट अध्यक्षका लागि आवेदन दिएका तीनजनाले आवेदनका क्रममा सानो त्रुटी गर्दा उनीहरु प्रतिस्पर्धाबाट स्वतः बाहिरिनसक्ने सम्भावना देखिएको हो ।
नेपाल धितोपत्र बोर्डको आगामी अध्यक्षका लागि खुल्ला प्रतिस्पर्धा गराउने नीतिअनुसार आवेदन आह्वान गरिएकोमा १९ जनाले दरखास्त दिएका छन् । जसमा सरकारी तहबाट ५ जनाको आवेदन परेको छ । बाँकी विभिन्न क्षेत्रबाट १४ जनाले आवेदन दिएका छन् । आवेदन दिएकाहरुको सर्टलिस्ट तयार गर्ने काम अन्तिम चरणमा पुगेको छ ।
यो प्रतिस्पर्धामा भाग लिन सेवारत निकायबाट विभागीय स्वीकृति प्रदान गरिएको स्वीकृतिपत्र(नो अब्जेक्सन लेटर अर्थात एनओसी) समेत आवेदनका साथमा संलग्न गर्नुपर्ने थियो ।
अध्यक्षका लागि आवेदन दिएकामा सेबोनबाट ३ जना र नेपाल स्टक एक्सचेञ्जबाट २ जना रहेका छन् । यीमध्ये सेबोनबाट अध्यक्षका लागि दरखास्त दिएका ३ जनाले नै आवेदनका साथमा एनओसी नै नराखेका अर्थमन्त्रालयस्थित उच्च स्रोतले जानकारी दिएको छ ।
धितोपत्र बोर्डबाट निमित्त प्रमुख डा. नवराज अधिकारी, प्रवक्ता मुक्तिनाथ श्रेष्ठ र कृष्ण पोखरेलले अध्यक्षका लागि आवेदन दिएका छन् । तर, उनीहरु कसैले पनि एनओसी भने पेश नगरेका स्रोतको दाबी छ । उनीहरु तीनैजनाले धितोपत्र बोर्डको सञ्चालक समितिबाट एनओसी लिनुपर्ने थियो, तर कसैले लिएनन् । जसका कारण उनीहरुको आवेदन स्वतः रद्ध हुने जोखिम देखिएको छ ।
धितोपत्र बोर्डको सञ्चालक समितिमा अर्थमन्त्रालयबाट प्रतिनिधित्व गर्ने सहसचिव रितेशकुमार शाक्य र राष्ट्रबैंकबाट प्रतिनिधित्व गर्ने डा. प्रकाशकुमार श्रेष्ठ दुवैजनाले बिजशालासँग कुरा गर्दै सेबोनबाट आवेदन दिएका तीनैजनाले एनओसी नलिएको प्रष्ट पारे । ‘सेबोनबाट अध्यक्षका लागि आवेदन दिएका तीनैजनाले सञ्चालक समितिलाई एनओसीका लागि अनुरोध गरेको वा एनओसी लिएको विषय हामीलाई थाहा छैन ।’–शाक्य र श्रेष्ठले बिजशालासँग भने ।
यस विषयमा धितोपत्र बोर्डका निमित्त अध्यक्ष डा. नवराज अधिकारीसँग बुझ्न खोज्दा उनले ‘एनओसी भनेको के हो ? अध्यक्षका लागि दरखास्त दिंदा त्यस्तो कागजात पनि पेश गर्नुपर्छ र ?’ भन्दै अनभिज्ञता प्रकट गरे । उनी आफूलाई प्रधानमन्त्री पुष्पकमल दाहालको पारिवारिक सदस्य बताउने गर्छन् । यसपटकको बोर्डको अध्यक्ष आफैं रहेको र प्रधानमन्त्रीबाट प्रष्ट वचन समेत पाइसकेको उनले निकटस्थहरुसँग बताउने गरेका छन् ।
पूँजीबजारको प्रमुख नियामक निकाय सेबोनका तीन अधिकारीहरुले सञ्चालक समितिबाट एनओसी नलिए पनि बजारको फ्रन्टलाइन रेगुलेटर नेपाल स्टक एक्सचेञ्जबाट आवेदन दिएकाहरु भने यो विषयमा स्मार्ट र चनाखो देखिए । नेप्सेका प्रमुख कार्यकारी अधिकृत कृष्णबहादुर कार्की र प्रवीण पन्धाक दुवैले सञ्चालक समितिबाट एनओसी लिएर दरखास्तको साथमा पेश गरेको देखिएको छ ।
कानूनविद् हरिबहादुर केसीले अध्यक्षको आवेदन माग्दा तयार गरिएको कार्यविधिमा स्पष्ट रुपमा एनओसी मागिएकोले त्योबिना पेश भएको दरखास्त स्वतः रद्द गरिनुपर्ने तर्क पेश गरे ।
.jpg)
.gif)
