कारोबार वृद्धिसँगै नेप्से परिसूचकमा सामान्य सुधार, जानकार भन्छन्, ‘अब बढ्ने संकेत देखियो’

काठमाण्डौ । आजको कारोबारमा सेयरबजार सामान्य अंकले बढेको छ । आज नेपाल स्टक एक्सचेञ्ज (नेप्से)परिसूचक ०.१७ प्रतिशत अर्थात ४.९९ अंकले बढेर २ हजार ७८२.१० विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.२५ प्रतिशतले बढेर ४७५.५१ विन्दुमा पुगेको छ।

आज नेप्सेमा सूचीकृत ३५४ वटा स्क्रिप्टका १ करोड ५२ लाख ४९ हजार ७१२ कित्ता सेयर किनबेच हुँदा कुल कारोबार रकम ६ अर्ब ३ करोड ६४ हजार बढीको सेयर कारोबार भएको छ । अघिल्लो दिन भने ४ अर्ब ८५ करोड बढीको सेयर कारोबार भएको थियो ।

आजको बजारबारे नेपाल इन्भेष्टर्स फोरमका अध्यक्ष तुलसीराम ढकाल भन्छन्, ‘सेयरबजार कुनै न कुनै ठाउँमा गएर बढ्नैपर्छ भन्ने लगानीकर्ताहरुको मान्यता हो । आजको बजार सामान्य बढाई मात्रै हो तर भोल्युमले साथ दिएका कारण बजार बढ्न सक्ने संकेत देखाएको छ । बजार यसअघि धेरै तल्लो विन्दुमा झरिसकेका कारण पनि आज सामान्य सुधार मात्रै देखिएको छ ।’

तर अन्य लगानीका क्षेत्रहरु खासै राम्रो नभएका कारण सेयरबजार नै लगानीको उपयुक्त सेक्टर मानिएको उनको तर्क छ । ‘बैंक तथा वित्तीय संस्थाहरुमा समेत सस्तो ब्याजदरमा कर्जा पर्याप्त पाइने अवस्था छ । बीचमा नयाँ सरकारको पोलिसी र गतिविधिका कारण सेयरबजारमा धक्का पुग्यो तर सरकारको नीति तथा कार्यक्रममा पूँजीबजारलाई सरकारले प्राथमिकता दिइएको देखिन्छ, जसकारण लगानीकर्ताहरु हतोत्साहित हुनुपर्ने अवस्था छैन । हामी बजेटको संघारमा छौ यसकारण आगामी आवको बजेट पूँजीबजारमैत्री हुन्छ भन्ने लगानीकर्ताहरु आशावादी छन्,’ उनले भने ।

कुन समूहमा भयो कतिको थपघट ?

आज कारोबारमा आएका १३ वटा समूहमध्ये ९ वटामा हरियाली छायो भने ४ वटामा रातो पोतियो । आज व्यापार समूह सर्वाधिक अर्थात ०.७३ प्रतिशतले बढ्यो । यस्तै बैंकिङ समूह ०.२७ प्रतिशत, विकास बैंक ०.१३, हाईड्रो ०.०६, लगानी ०.५८, जीवन बीमा ०.६८, लघुवित्त ०.२९, म्युचुअल फण्ड ०.३९ र निर्जीवन बीमा ०.५४ प्रतिशतले बढ्यो ।

उत्पादन तथान प्रशोधन समूह आज सर्वाधिक अर्थात ०.४३ प्रतिशतले घट्यो । फाइनान्स समूह पनि आज ०.३८ प्रतिशत, होटल ०.२४ र अन्य ०.३० प्रतिशतले घट्यो ।  

सर्वाधिक कारोबार हुने कम्पनी

आज आँखुखोला जलविद्युतको सर्वाधिक अर्थात ७१ करोड २२ लाख बढीको सेयर कारोबार भयो । यस्तै रिडी पावरको ४३ करोड २७ लाख, नेशनल हाईड्रोपावरको ३२ करोड १५ लाख, अपि पावरको २० करोड ८५ लाख, र ङादी ग्रुप पावरको १५ करोड ७० लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा कम्पनीको सेयरमूल्यमा मात्रै अपर सर्किट लाग्यो। आज कालिञ्चोक हाईड्रोको सेयरमूल्यमा मात्रै अपर सर्किट लाग्यो ।

यस्तै आज बुङ्गल हाईड्रोको सेयरमूल्य १३.३७ प्रतिशत, क्रेष्ट माइक्रो लाइफको ८.५२ र आँखुखोला जलविद्युतको सेयरमूल्य ३.९३ प्रतिशतले बढ्यो ।

यो दिन श्रृजनशिल लघुवित्तको सेयरमूल्य सर्वाधिक अर्थात ४.९३ प्रतिशतले घट्यो ।