_New.gif)
.gif)
.png)
काठमाण्डौ । उद्योगपति तथा व्यवसायी अरुण चौधरीलाई हठात् पक्राउ गरिएको भन्दै निजी क्षेत्रका विभिन्न प्रतिनिधिमूलक संघसंगठनले आकस्मिक पत्रकार सम्मेलन आह्वान गरेका छन् ।
नेपाल उद्योग वाणिज्य महासंघ, नेपाल चेम्बर अफ कमर्स र नेपाल उद्योग परिसंघले संयुक्त रुपमा आज साँझ ५ बजे काठमाण्डौको बानेश्वरस्थित होटल एभरेष्टमा आकस्मिक पत्रकार सम्मेलन बोलाएका हुन् ।
सिजी होल्डिङ्सका अध्यक्ष तथा प्रबन्ध निर्देशक अरुण चौधरीलाई प्रहरीको केन्द्रीय अनुसन्धान ब्यूरोले बिहीबार पक्राउ गरेकोमा निजी क्षेत्रका प्रतिनिधिमूलक संघसंस्थाका नेताहरुले आपत्ति जनाइसकेका छन् । सोही विषयमा एउटै सन्देश दिने उद्देश्यले आकस्मिक र संयुक्त पत्रकार सम्मेलन आयोजना गरिएको हो ।
बाँसबारी छालाजुत्ता कारखानाको १० रोपनी सरकारी जग्गा हडपेर चौधरी ग्रुपको नाममा लगेको आरोपमा अरुण चौधरीलाई पक्राउ गरिएको थियो । चौधरीसँगै छाला जुत्ता कारखानाका तत्कालीन सञ्चालक समिति अध्यक्ष अजित नारायणसिंह थापा र कारखानाको सञ्चालक समितिका वर्तमान अध्यक्ष सञ्जय ठाकुर पनि पक्राउ परेका छन् ।
पक्राउ परेका तीनैजनालाई हिरासतमा राख्ने अनुमति माग्दै सीआईबी काठमाण्डौ जिल्ला अदालतमा पुगेको छ
अदालतले तीनैजनालाई थप हिरासतमा राखी अनुसन्धान गर्न अनुमति दिने सम्भावनासँगै निजी क्षेत्रका संघसंस्थाहरु सरकारी कदमको विरोधका लागि एकजुट बनेका हुन् ।
निजी क्षेत्रका संघसंगठनका नेताहरुले कुनै आरोप लाग्दैमा व्यवसायीलाई पक्राउ गरिनु राज्यको गलत रबैया भएको टिप्पणी गरिरहेका छन् । कतिपयले त अरुण चौधरीको पक्राउ प्रकरणलाई राज्य संरक्षित आतंकको समेत संज्ञा दिएका छन् ।
.png)
.gif)
