सर्वोच्च अदालतद्वारा दुर्गा प्रसाईंलाई पक्राउ गर्नुको कारण माग

काठमाण्डौ । सर्वोच्च अदालतले दुर्गा प्रसाईलाई पक्राउ गर्नुको कारण माग गरेको छ । सर्वोच्च अदालतले नेपाल सरकार र प्रहरीसँग प्रसाईलाई पक्राउ गर्नुको कारण माग गरेको हो ।  

मंगलबार न्यायाधीश प्रकाशमान सिंह राउतको इजलासले प्रधानमन्त्री तथा मन्त्रिपरिषदको कार्यालय, गृह मन्त्रालय, प्रहरी प्रधान कार्यालय, प्रहरीको साइबर ब्यूरो र जिल्ला अदालत काठमाण्डौसँग प्रसाईंलाई पक्राउ गरेर थुनामा राख्नुको कारण माग गरेको छ ।

प्रसाईका छोरा निराजनले बुवा पक्राउ परेपछि सर्वोच्चमा बन्दी प्रत्यक्षीकरणको रिट दायर गरेका थिए । प्रसाईंलाई असोज ६ गते प्रहरीले भक्तपुरको मध्यपुर थिमी नगरपालिका–६ कमेरोटारस्थित निजी निवासबाट पक्राउ गरेको थियो ।  

उनी साइबर ब्यूरोबाट खटिएको टोली र भक्तपुर प्रहरीको सहयोगमा पक्राउ परेका थिए । काठमाण्डौ जिल्ला अदालतले प्रसाईंलाई पक्राउ गरेर अनुसन्धान गर्न गत असोज २ गते पक्राउ पुर्जी गरेको थियो ।