विगत एक वर्षदेखि बजार अपट्रेण्डमै, कहिलेदेखि सकिनसक्छ बुल ?(साप्ताहिक विश्लेषणसहित)

काठमाण्डौ । यो साता सेयर बजारमा ४ दिन कारोबार भयो । चार दिनमा बजार २ दिन बढ्यो भने २ दिन नै घट्यो । अघिल्लो साता २६२७.१४ को बिन्दुमा बन्द भएको बजार यो साता २६७७.६२ मा बन्द भयो । यस हिसाबले यो साता ५०.४८ अंकले बजार बढ्यो । अघिल्लो साता ११८.२२ अंकले बजार घटेको थियो ।

यो साता ४ दिन कारोबारमा २२.१६ अर्बको सेयर कारोबार भयो । अघिल्लो साता ५ दिन कारोबारमा २९.९५ अर्बले सेयर कारोबार भएको थियो । यस हिसाबले यो साता दैनिक औसत कारोबार ५ अर्ब ५४ करोड सेयर कारोबार भयो । अघिल्लो साता भने करिब ६ अर्ब दैनिक औसत कारोबार भएको थियो । यस हिसाबले यो साता बजार बढेता पनि सेयर कारोबार भने घटेको छ । यो साता नेप्सेमा बजार पूँजीकरण ४२.६० खर्ब रह्यो । अघिल्लो साता यस्तो बजार पूँजीकरण ४१.७७ खर्ब रहेको थियो । यस हिसाबले यो साता बजार बढ्दा  ८३ अर्बले बजार पूँजीकरण बढ्यो । 

प्राविधिक पक्ष:

मन्थ्ली बेसमा बजारको अवस्था कस्तो ?

यो साता अक्टोबर महिना सकिएको कारण हामीले बजारलाई  साप्ताहिकसँगै मन्थ्ली बेसमा पनि अवस्था नियालेका छौं ।  

मन्थ्ली बेसमा बोलिङ्गर ब्याण्डमा बजार बिगत १  बर्षदेखि मध्यब्याण्ड भन्दा माथि चलेको छ । जसमा बजार ७ महिना मध्यब्याण्डमा चलेको छ भने ४ महिना अपर ब्याण्डमा चलेको छ ।  

पछिल्लो चार महिनामा बजार २ महिना बढेको छ भने २ महिना घटेको छ । जसमा बजार जुलाईमा बजार झण्डै एकहजार अंकले बढेको छ । अगष्ट र सेप्टेम्बरमा बजारमा करेक्सन आएको छ भने अक्टोबरमा १७७ अंकले बजार बढेको छ ।  

मन्थ्ली बेसमा हेर्दा बजारले २५ सयमाथि नै घट्दा पनि सपोर्ट लिएको छ । यस हिसाबले बिगतका ४ वटा बुल र ४ वटा बियरिस बजारलाई पनि आधार मानेर मन्थ्ली बेसमा हेर्दा अझै तीन महिना बजार बढ्ने तर, सानो अंकले मात्रै सुधार हुनसक्छ । अर्थात बजार नोभेम्बर, डीसेम्बर र जनवरीसम्म नेप्सेको बढाई सुस्त पनि हुनसक्छ ।  

त्यसपछि जनवरीदेखि जुलाईसम्म बजारमा फेरी ठूलो बुल चलेर सम्भवतः आउने जुलाईदेखि अगष्ट भित्रमा हालको बुल सकिन सक्छ ।  

यो समयमा बजार अपरब्याण्डमा नै चल्नसक्छ । त्यो समयमा बजारले जब अपरब्याण्ड छोड्छ, त्यसपछि बजारमा बुल सकिएको मान्न सकिन्छ । तर हालसम्म लामो समयमा पनि बजारले अपरब्याण्ड नछोडेका कारण बजार बुल नै भएको निश्चित गर्न सकिन्छ । 

साप्ताहिक रुपमा कस्तो ?

साप्ताहिक रुपमा पनि बजार २ साता बढेपछि यो साता घटेको छ । डेली बेसमा बजार बोलिङ्गरको मध्यब्याण्ड भन्दा माथि चलेको छ । म्याक्डीमा हिस्टोग्राम नेगेटिभ भएर पनि फेरि सकारात्मक बनेका छन् ।  

आरएसआई ५० को न्यूट्रल जोन भन्दा माथि चलेको छ । यद्यपि मनिफ्लो इण्डेक्समा भने बजारमा कुनै सुधार भएको देखिन्न । अर्थात कारोबार र भोलुममा कुनै सुधार भएको देखिँदैन ।  

पिभट प्वाइन्ट

बढेमा प्रतिरोध  

प्रतिरोध ३ – २८६४

प्रतिरोध २ – २७९७

प्रतिरोध १–  २७१४

पिभट प्वाइन्ट: २६६३

घटेमा सपोर्ट  

सपोर्ट १– २५७८

सपोर्ट २– २५२९

सपोर्ट  ३ –२४४४

निश्कर्ष: अघिल्लो साता ११८ अंकले घटेको सेयरबजार यो साता ५० अंकले बढ्यो । पछिल्लो सातामा बजारले २६१५ मा बलियो सपोर्ट बनाएको छ । अर्थात बजारले ट्वीजर बटम बनाएको छ ।  

यो साता २६७७ मा बन्द भएको बजार आगामी साता यदि २७२७ को बिन्दु भन्दा माथि बन्द हुन्छ  भने बजारले माथिको यात्रा लिनसक्छ । यो साता पिभट प्वाइन्ट २६६३ भन्दा माथि नै बजार बन्द भएको कारण बजारको आगामी साता पनि अपट्रेण्ड लिनसक्छ । तर त्यसका लागि बजारमा कारोबारले भने साथ दिनुपर्नेछ ।  

लामो समय अवधि मन्थ्ली बेस्डमा बजारलाई हेर्दा अपट्रेण्डमा चलेको देखिन्छ । अर्थात डाउथेउरीमा पनि बजारले हायर हाइ र हायर लोका सिरिजहरु चल्दै गरेको देखिन्छ ।  

(नोट: सेयर बजारमा लगानी जोखिमपूर्ण हुन्छ, यो विश्लेषण कारोबारका लागि सिफारिस भने होइन।)