अमेरिकी केन्द्रीय बैंकले लत्यायो ट्रम्पको माग, ब्याजदर स्थिर राख्ने निर्णय

काठमाण्डौ । अमेरिकी केन्द्रीय बैंक,फेडरल रिजर्भ(फेड)ले ब्याजदर स्थिर राख्ने निर्णय गरेको छ । ब्याजदर थप घटाउने राष्ट्रपति डोनाल्ड ट्रम्पको मागलाई बेवास्ता गर्दै फेडले तीनवटा बैठकपश्चात ब्याजदरमा कुनै पनि परिवर्तन नगर्ने निर्णय गरेको हो ।  

फेडले राष्ट्रपतिको रुपमा कार्यभार सम्हाल्नु केही महिना अघि भने ब्याजदरमा कटौती गरेको थियो । ट्रम्पले ब्याजदर स्थिर राख्ने फेडको निर्णयको विरोध गरेका छन् । ट्रम्पले मुद्रास्फितीसँगै फेडले सुरु गरेको समस्या अन्त्य गर्न केन्द्रीय बैंक असफल भएको बताएका छन् । ट्रम्पले आफ्नो पहिलो कार्यकालमा जेरोमी पावेललाई फेडको अध्यक्ष चयन गरेका थिए ।  

यस्तै ट्रम्पले बैंकहरुको नियमनको विषयमा फेटले एकदमै गलत काम गरेको समेत आरोप लगाएका छन् । उनले यसको सम्पूर्ण जिम्मेवारी ट्रेजरी डिपाट्मेन्टले लिनु पर्ने समेत बताएका छन् । यद्यपी ट्रम्पले लामो समयदेखि बैंकिङ नियमन गरिरहेको फेडलाई यो जिम्मेवारीबाट कानूनी रुपमा मुक्त गर्न सक्षम हुन्छन् वा हुँदैनन् भन्ने विषयमा स्पष्टता नरहेको जनाइएको छ ।  

फेड अध्यक्ष जेरोमी पावेलले भने ट्रम्पको अभिव्यक्ति प्रति कुनै पनि टिप्पणी दिन अस्विकार गरेका छन् । उनले यस्तो गर्न आफ्नो पदीय मर्यादाले नदिने बताएका छन् ।  

यद्यपी पावेलले फेडको स्वायत्तताको विषयमा भने वकालत गरेका छन् ।  

बुधबारको पत्रकार सम्मेलनका क्रममा पावेलले आप्रवासी कामदारको न्यून आगमनका कारण पछिल्लो समय अमेरिकामा बेरोजगारी दरमा कमी आएको बताए । यद्यपी रोजगारी सिर्जनामा भने केही सुस्तता आएको समेत उनले बताए ।