पूँजी बजारबाट एकै महिनामा उठ्यो १ अर्ब ३३ करोड राजश्व, धेरै कर तिर्नेमा अल्पकालिन कारोबारी

काठमाण्डौ । सरकारले एक महिनामा पूँजी बजारबाट १ अर्ब ३३ करोड २ लाख ३७ हजार रुपैयाँबराबरको राजश्व संकलन गरेको छ । सीडीएससीले दिएको तथ्यांकअनुसार सरकारले फागुन महिनामा पूँजीबजारबाट उक्त रकमबराबरको राजश्व संकलन गरेको हो ।  

जसमध्ये सबैभन्दा बढी कर तिर्नेमा अल्पकालिन कारोबारी देखिएका छन् । यो अवधिमा अल्पकालिन लगानीकर्ताहरुले ८१ करोड ४२ लाख रुपैैयाँ कर तिरेका छन् भने दीर्घकालिन लगानीकर्ताहरुले ३६ करोड ३८ लाख कर तिरका छन् । 

यस अवधिमा संस्थागत लगानीकर्ताहरुले १४ करोड ९७ लाख र स्टक डिलरहरुले करिब २४ लाख ५१ हजार कर तिरेका छन् । गत महिना यसरी धेरै राजश्व उठ्नुको कारण बजार बढेर ३ हजार  नजिक पुग्नु तथा प्राथमिक सेयर दोस्रो बजारमा आउदा लगानीकर्ताले सेयर बेच्नु जस्ता कारण रहेको सीडीएससीका प्रवक्ता सृुरेश न्यौपानेले जानकारी दिए ।  

धितोपत्र ऐनअनुसार एक वर्ष भन्दा कम समय अवधिमा सेयर बेच्नेलाई अल्पकालिन र एक वर्षभन्दा बढी समय अवधिमा सेयर बेच्नेलाई दीर्घकालिन लगानीकर्ता भनेर छुट्टाइएको छ । जसअनुसार अल्पकालिन लगानीकर्ताले ७.५ प्रतिशत,दीर्घकालिन लगानीकर्ताहरुले ५ प्रतिशत कर तिर्दै आएका छन् । संस्थागत लगानीकर्ताहरुले भने हाल १० प्रतिशत कर तिर्दै आएका छन् ।