योग्यता विवादमा मुछिएका लुइँटेल नेप्सेको सीईओमा नियुक्त

काठमाण्डौ । नेपाल स्टक एक्सचेन्ज (नेप्से)को प्रमुख कार्यकारी अधिकृत(सीईओ)मा नारद लुइँटेल नियुक्त भएका छन् ।  

मन्त्रिपरिषदको सोमबार साँझ बसेको बैठकले लुइँटेललाई नेप्सेको सीईओ नियुक्त गरेको सरकारका एक मन्त्रीले बिजशालालाई जानकारी दिए । 

नेप्सेको सीईओ बनेका लुइँटेल सर्लाही स्थायी घर भई तारागाउँ विकास समितिको सदस्य सचिव भइसकेका व्यक्ति हुन् । २०७८ फागुनमा तत्कालीन संस्कृति, पर्यटन तथा नागरिक उड्डयनमन्त्री प्रेमबहादुर आलेले मन्त्रीस्तरीय निर्णयबाट उनलाई तारागाउँको सदस्य सचिवमा नियुक्ति गरेका थिए । उनी त्यसअघि पनि एक कार्यकाल सदस्य सचिव भइसकेका थिए । तर पुँजीबजार वा वित्तीय क्षेत्रमा काम गरेको लामो अनुभव लुइँटेलसँग छैन । उनी साढे २ वर्ष मात्रै कम्पनी सचिव भएका थिए । 

उनी सर्टलिष्टमा परेको दिनदेखि नै नेप्सेको सीईओका लागि हाल कार्यविधिले तोकेको योग्यता नपुग्ने भन्दै विवाद भएको थियो । सो कार्यबिधिमा भनिएको छ ‘पूँजीबजार वा वित्तिय क्षेत्र वा व्यबस्थापनसम्बन्धी कार्यमा कम्तीमा सात वर्ष उच्च ब्यबस्थापकिय क्षेत्रमा अनुभव सहित कम्तीमा १५ वर्षको अनुभव हुनुपर्ने ।’