प्रि–ओपन र अन्तिम १५ मिनेटको भारित औषतको विषयमा लगानीकर्ताको गुनासो बढ्दै, के भन्छ नेप्से ?

काठमाण्डौ। नेप्सेले हालै लागू गरेको अन्तिम १५ मिनेट र प्रि–ओपन सेसनको विषयमा लगानीकर्ताहरुबाट गुनासो सुनिन थालेको छ । अन्तिम १५ मिनेटको भारित औषत मूल्यको विषयमा बजारमा दुईथरी विचार सुनिन्छ । एक थरीले यो आवश्यक नै नरहेको भन्ने तर्क गर्ने गरेका छन् भने अर्को थरीले १५ मिनेट्बाट बढाएर आधा घण्टा हुनु पर्ने बिचार पनि राखेको पाइन्छ ।  

यो विधि खासगरि अन्तिम समयमा खेलाडीले सेयरको मूल्यमा गरेको चलखेल रोक्ने उद्देश्यले नेप्सेले ल्याएको थियो । तर सेयर खेलाडीले भने अनेक जुक्ति लगाउन छाडेका भने छैनन् । अहिले पनि अन्तिम समयमा सेयरका ठूला कित्ताहरु म्याचिङ गरेर मूल्य प्रभावित गर्ने गरेको चर्चा बजारमा सुनिन्छ । लगानीकर्ताहरुले नेप्सेको सुूचक ढिलो अपडेट हुने गरेको गुनासो पनि गरेको सुनिन्छ ।  

यसै विषयमा नेप्सेका प्रवक्ता मूराहरी पराजुलीले डेटा अपडेट गर्न केही समय लागेको कारण सूचना अपडेट गर्न ढिलो भएको बताए । बिस्तारै यसको समय पनि घट्दै जाने उनको भनाइ छ ।  

त्यसैगरि, हाल बजारमा प्रि – ओपन सेसनको विषयमा पनि विभिन्न सामाजिक सञ्जालहरुमा चर्चा चलेको पाइन्छ । खासगरि, लगानीकर्ताहरुले प्रि –ओपन सेसनमा बजारको मूल्यमा चलखेल गर्ने गरेको आरोप लगाउँदै आएका छन् । प्रि –ओपन सेसन १०ः३० देखि १०ः४५ बजेसम्म चल्ने गर्छ । यस विषयमा बोल्दै नेप्सेका प्रवक्ता पराजुलीले भने, ‘नेप्सेमा नियमित कारोबार हुन भन्दा पहिले र पछि इन्ड अफ डे र बिगिनिङ अफ द डे हुने गरेको छ। बिगिनिङ अफ द डे अर्थात प्रि–ओपनका केही उद्देश्य हुन्छन् ।’ उनले थप्दै भने,  ‘प्रि ओपन सेसनले नियमित सेसनको उतारचढावलाई कम गर्छ । यो विश्वभरकै पूँजीबजारमा हुने गर्छ । ’

उनले उदाहरण दिँदै भने, ‘जस्तो ३ बजेपछि कुनै घटना क्रमले भोलिपल्टको  बजारमा ठूलो उतारचढाव हुने अवस्था आयो भने त्यस्तो अवस्थामा प्रि–ओपन सेसनमा नै बजारमा उतारचढाव हुन्छ । जसले नियमित सेसनमा बजारमा यसको प्रभाव कम हुन्छ । यसले फेयर भ्यालु निधारण गर्ने गर्छ । यसकारण यो हटाउने विषय होइन । यदि कतैबाट गुनासो छ भने यो लगानीकर्ताले नबुझेर हो ।’  

‘यसैगरि हालको अडर राख्दाको २ प्रतिशतले तलमाथि गर्न मिल्ने नियम पनि बजार रेगुलेसन गर्न नै तय गरिएको हो । यसलाई कारोबार बिनियामावली परिवर्तन गरेर हेरफेर गर्न सकिन्छ । मुख्य विषय हाम्रो जस्तो बजारमा यसको आवश्यकता कति छ भन्ने नै हो,’ पराजुलीले भने ।