नेप्से इण्डेक्स र टर्नओभरमा गतिलो बाउन्सब्याक, उकालो यात्रा जारी रहने विज्ञको तर्क

काठमाण्डौ । सेयर बजारमा गतिलो बाउन्स ब्याक भएको छ ।  

नेपाल स्टक एक्सचेञ्ज लिमीटेड(नेप्से) परिसूचक मंगलबार ६२ अंकले बढेर २५७१.३४ को विन्दूमा फर्किएको हो ।  

बजार वृद्धिका लागि आवश्यक अधिकांश आधारहरु तयार भइसकेका कारण लगानीकर्ताहरुमा थोरै भए पनि आत्माबल फर्किँदा त्यसको सकारात्मक प्रभाव आजको कारोबारमा देखिएको हो ।  

मंगलबार नेप्से परिसूचकमा उछालसँगै कारोबार रकम पनि अघिल्लो कारोबार दिनको तुलनामा बढेको छ । इण्डेक्स र टर्नओभर सँगसँगै बढ्नुले लगानीकर्ताहरुमा खरीदतर्फको आत्माविश्वास बढेको र बिस्तारै निस्क्रिय बसेका लगानीकर्ताहरुले समेत बजारमा पैसा खन्याउन थालेका देखिएको छ । 

मंगलबारको बजारको विषयमा नेपाल इन्भेष्टर्स फोरमका अध्यक्ष तुलसीराम ढकाल भन्छन्, ‘बजार पहिल्यै बढ्नुपर्ने हो, तर विभिन्न अवस्थाहरुले गर्दा बजारले लय समात्न सकिरहेको थिएन । जेनजीहरुको आन्दोलन, क्लोजिङको समय र चाडपर्वले गर्दा बजार बढ्न सकिरहेको थिएन । सबै कुराहरु सकारात्मक हुँदाका बाबजुत पनि लगानीकर्ताहरुमा कन्फिडेन्ट बढ्न नसकेको कारण बजार माथि जान सकेको थिएन ।’

उनले थपे, ‘आज बजार बढ्नुको मुख्य कारण भनेकै लगानीकर्ताहरुमा कन्फिडेन्ट बढ्नु हो । चाडपर्व सकिएलगत्तै अब लगानीकर्ताहरु बजारतर्फ तानिएका छन् । नेपाल राष्ट्र बैंककाअनुसार बैंक वित्तीय संस्थाहरुमा ११ खर्ब भन्दा बढी तरलता पर्याप्त छ । लगानीकर्ताहरुले ८ प्रतिशत हाराहारीमै लोन पाइरहेका छन् । बैंक वित्तीय संस्थाहरुको सीडी रेसियो अनुपात राम्रो छ । अब लगानीकर्तामा आत्मबल बढेको छ । बजार अब अझै बढ्छ । जसले यो समयमा बुझेर राम्रो कम्पनीमा लगानी गरेको छ, उसले केही समयपश्चात् डबल रिटर्न पाउने देखिन्छ । अहिलेको समय भनेको लगानीको अवसर पनि हो ।’

के-के भयो बजारमा ?

यो दिन व्यापारबाहेकका सबै समूहको सूचकमा हरियाली छाएको छ । सबैभन्दा बढी विकास बैंक समूहको सूचक ४.४७ प्रतिशतले बढेको यो दिन वाणिज्य बैंक समूहमा १.९२ प्रतिशत, बित्त समूहमा ३.१४ प्रतिशत, जीवन बीमा समूहमा ३.५५ प्रतिशत र निर्जीवन बीमा समूहमा २.५४ प्रतिशतको बढोत्तरी भएको छ । 

यस्तै, होटल तथा पर्यटन समूहमा २.८० प्रतिशतको वृद्धि देखिएको छ भने जलविद्युत समूहमा ३.९० प्रतिशत, लगानी समूहमा ३.१९ प्रतिशत, उत्पादन तथा प्रशोधन समूहमा ०.३७ प्रतिशत, माइक्रोफाइनान्स समूहमा २.५९ प्रतिशत, अन्य समूहमा १.९१ प्रतिशत र म्युचुअल फण्ड समूहमा ०.४६ प्रतिशतको बढोत्तरी भएको छ ।

व्यापार समूह भने ०.७६ प्रतिशतको गिरावट आएको छ ।  

यो दिन कारोबारमा आएकामध्ये २३६ कम्पनीको सेयरमूल्य बढेको छ भने १२ कम्पनीको मूल्य घटेको छ । बाँकी २ कम्पनीको मूल्य स्थिर रह्यो ।  

बजारमा कुल ३१४ कम्पनीका ९२ लाख ४३ हजार ७२३ कित्ता सेयर ४७ हजार ९४ वटा कारोबारमार्फत कुल ४ अर्ब ४७ करोड ३९ लाख ४३ हजार  ४०५ रुपैयाँ बराबरको किनबेच भएको छ ।

अघिल्लो कारोबार दिन भने टर्नओभर २ अर्ब ६६ करोडमा सीमित थियो ।  

धेरै कारोबार गर्ने कम्पनी

यो दिन धेरै कारोबार गर्ने टप फाइभ कम्पनीको सूचमा ४ वटा जलविद्युत कम्पनीले कब्जा गरेका छन् ।  

यो दिन हिमालयन पावर पार्टनर लिमीटेडले सबैभन्दा धेरै २४ करोड ९४ लाख बढीको कारोबार गरेको छ ।  

युनियन हाइडोपावर लिमीटेडले २३ करोड २२ लाख बढीको कारोबार गरेको यो दिन राधी विद्युत कम्पनीले २२ करोड हाराहारीमा कारोबार गरेको छ ।  

बुटवल पावर कम्पनीको १९ करोड ४७ लाख बढीको कारोबार भएको यो दिन पाँचौं बढी कारोबार एनआरएन इन्फ्रास्टक्चर एण्ड डेभलपमेन्ट कम्पनीको रहेको छ । यसले १९ करोड ३५ लाख बढीको कारोबार गरेको छ ।  

धेरै कमाउने र गुमाउने कम्पनी

यो दिन न्यादी हाइडोपावरको सेयरमूल्यमा पोजिटिभ सर्किट लागेको छ । कम्पनीको सेयरमूल्य एकैदिन ३६ रुपैयाँले बढेर प्रतिकित्ता ३९६ रुपैयाँको उचाईमा फर्किएको छ ।  

बुटवल पावर कम्पनीको सेयरमूल्यमा पनि पोजिटिभ सर्किटसँगै ६७.१० रुपैयाँ प्रतिकित्ताको दरले बढेर ७३९ को उचाईमा पुगेको छ ।  

एक्सल डेभलपमेन्ट बैंकको सेयरमूल्यमा पनि पोजिटिभ सर्किट लागेको छ भने राधी विद्युत कम्पनीको मूल्य पोजिटिभ सर्किट लेभल नजिकै पुगेको छ ।  

यो दिन लुम्बिनी विकास बैंकको सेयरमूल्य ९.३५ प्रतिशतले बढेको छ ।  

यो दिन हिमालयन पावर पार्टनर लिमीटेडमा बिक्री चाप देखिएको छ । जसका कारण यो कम्पनीको सेयरमूल्यमा ६.३६ प्रतिशतको गिरावट देखिएको छ ।  

युनिलिभर नेपाल लिमीटेडका लगानीकर्ताले ३.८८ प्रतिशतले सम्पत्ति गुमाएका छन् भने बोटलर्स नेपाल(बालाजु) लिमीटेडको सेयरमूल्य ३.७७ प्रतिशतले घटेको छ ।