एकमिनेटमै २२६ कम्पनीको कारोबार, मूल्य घट्ने एउटै कम्पनी बन्यो रिलायन्स

काठमाण्डौ । चुनावी परिणामपछि रास्वपाको नेतृत्वमा प्रचण्ड बहुमतसहितको स्थिर सरकार बन्ने विषयले लगानीकर्ताको मनोबल उच्च भएपछि सोमबार कारोबार खुलेको एक मिनेटमै सेयर बजारमा पोजिटिभ सर्किट लागेको छ ।  

यो क्रममा २२६ कम्पनीको सेयर खरीदबिक्रीमा आएको थियो । कारोबारमा आएका कम्पनीमध्ये २२५ को सेयरमूल्य बढ्यो । तर, अपवादको रुपमा विवादास्पद रिलायन्स स्पिनिंग मिल्स देखियो ।  

बजारमा उछाल आएर लगानीकर्ताको मनोबल उच्च हुँदा र एकमिनेटमै पोजिटिभ सर्किट लाग्दा रिलायन्सको मूल्य भने घटेको छ । 

रिलायन्सको मूल्य  १.४९ प्रतिशतले घटी ६७५ रुपैयाँमा सीमित बन्न पुगेको हो ।  

एकमिनेटमै बजारमा १९ करोड हाराहारीको सेयर किनबेच भएको देखिएको छ।  

सबैभन्दा बढी नारायणी डेभलपमेन्ट बैंकको सेयर खरीदबिक्री भएको देखिएको छ ।  

अरुण भ्याली हाइडोपावरको सेयरमूल्यमा सकारात्मक सर्किट लागेको छ । श्रीनगर एग्रीटेक, एक्सल डेभलपमेन्ट बैंक, मध्यभोटेकोशी जलविद्युत कम्पनी, पिपुल्स हाइडो लगायतका कम्पनीको सेयरमूल्य पोजिटिभ सर्किट लेभलमा पुगेको छ । 

एकमिनेटको छोटो अवधिमा अन्य समूहको सूचक ६.२३ प्रतिशतले बढेको छ । त्यसपछि जलविद्युत समूह करिब ५ प्रतिशतको उछालसहित अगाडि बढेको छ भने बैंकिंग र उत्पादन तथा प्रशोधन समूहको सूचक ४ प्रतिशतभन्दा बढीले वृद्धि भएको छ ।