ट्रम्पको चेतावानी-'होर्मुज खोल्न नमाने ईरानका तेलखानीहरु उडाउँछौं, खर्ग टापू ध्वस्त बनाइदिन्छौं'

काठमाण्डौ । अमेरिकी राष्ट्रपति डोनाल्ड ट्रम्पले ईरानलाई स्ट्रेट अफ होर्मुज तुरुन्त सञ्चालनमा ल्याउन दबाब दिएका छन्। उनले स्पष्ट रूपमा चेतावनी दिँदै यदि समुद्री मार्ग खुला नगरिएमा ईरानका प्रमुख ऊर्जा र पूर्वाधारमा सैन्य कारबाही हुन सक्ने संकेत गरेका हुन्।

ट्रम्पका अनुसार, वार्ताबाट छिटो निष्कर्ष ननिस्किए र होर्मुज खोलिएन भने अमेरिका ईरानका तेल उत्पादन क्षेत्र, विद्युत् केन्द्र, खार्ग टापु तथा पानी प्रशोधन (डिसेलिनेसन) संयन्त्रलाई निशाना बनाउन पछि नहट्नेछ। “अहिलेसम्म केही संरचनालाई जानाजानी जोगाइएको थियो, तर अब त्यसमा पनि परिवर्तन आउन सक्छ,” उनले चेतावनी दिए।

अमेरिका–ईरानबीच तनाव चरम अवस्थामा पुगेका बेला यस्तो कडा अभिव्यक्ति आएको हो। होर्मुज बन्द हुँदा विश्व तेल आपूर्तिमा असर परेको छ र अन्तर्राष्ट्रिय बजारमा मूल्य बढ्ने संकेत देखिएको छ। ट्रम्पले वार्ता जारी रहेको बताए पनि परिणाम नआए कडा कदम चालिने स्पष्ट पारेका छन्।

यता, ईरानले भने अमेरिकी प्रस्तावलाई अस्वीकार गर्दै त्यसलाई अव्यावहारिक ठहर गरेको छ। ईरानी पक्षले अमेरिकाले बारम्बार अडान परिवर्तन गर्ने गरेको आरोप लगाउँदै प्रत्यक्ष वार्तामा बस्न असहमति जनाएको छ।

यसैबीच, स्पेनले पनि अमेरिकी सैन्य गतिविधिमा सहयोग नगर्ने संकेत दिएको छ। स्पेनकी रक्षा मन्त्री मार्गारीटा रोब्लेसले ईरानसँग सम्बन्धित कुनै पनि सैन्य कारबाहीका लागि आफ्नो हवाई क्षेत्र वा आधार प्रयोग गर्न नदिने स्पष्ट पारेकी छन्।

यो समग्र घटनाक्रमले मध्यपूर्वमा थप अस्थिरता निम्त्याउने संकेत देखिएको छ भने विश्व ऊर्जा बजारमा दबाब अझै बढ्ने अनुमान गरिएको छ।

(स्रोत : अन्तर्राष्ट्रिय सञ्चार माध्यमहरू)