३०% ले बढ्यो मुक्तिनाथ बैंकको नाफा, अन्य सूचकको प्रगति कस्तो ?

काठमाण्डौ । मुक्तिनाथ विकास बैंकले चालु आर्थिक वर्षको तेश्रो त्रैमाससम्म ९४ करोड २६ लाख खूद नाफा आर्जन गरेको छ । यो भनेको अघिल्लो वर्षको सोही अवधिको तुलनामा ३० प्रतिशतले बढी हो ।  

खूद नाफा बढे पनि खराब कर्जा बढेका कारण बैंकको वितरणयोग्य मुनाफा तथा प्रतिसेयर नाफा भने घटेको छ । 

अघिल्लो वर्षको ९ महिनामा ४.४१ प्रतिशतमा सीमित खराब कर्जा अनुपात बढेर ४.८८ प्रतिशत पुगेको छ । यहीकारण अघिल्लो वर्ष करिब ६२ करोड रहेको वितरणयोग्य मुनाफा घटेर ४४ करोडमा सीमित बनेको छ भने वार्षिकीकृत प्रतिसेयर नाफा ८.०४ रुपैयाँबाट घटेर ७.०२ रुपैयाँमा सीमित भएको छ ।  

बैंकको सञ्चालन मुनाफा १ अर्ब ३ करोडबाट बढेर १ अर्ब ३५ करोडको उचाईमा पुगेको छ भने ३ अर्ब २८ करोडमा सीमित खूद ब्याज आम्दानी समेत वृद्धि भई ३ अर्ब ४४ करोड माथि पुगेको छ । 

खूद नाफा बढ्दा बैंकको वार्षिकीकृत प्रतिसेयर आम्दानी-इपीएस) १३.७१ रुपैयाँबाट बढेर १५.७१ रुपैयाँ पुगेको छ ।  

यस्तै, अघिल्लो वर्ष ०.७५ प्रतिशतमा सीमित रिटर्न अन एसेट बढेर ०.९३ प्रतिशत तथा ८.६६ प्रतिशतमा सीमित रिटर्न अन इक्वीटी बढेर १०.३८ प्रतिशतको उचाईमा पुगेको छ ।  

नियामकीय व्यवस्थाका कारण बैंकले इम्पेयरमेन्ट चार्जको रुपमा छुट्याउने रकम घटेको देखिएको छ, जसअनुसार अघिल्लो वर्षको यही अवधिसम्म यस्तो चार्जको रुपमा १ अर्ब २३ करोड छुट्याएको बैंकले समीक्षा अवधिमा भने ९२ करोड ५७ लाख रुपैयाँ मात्र छुट्याउनु परेको छ ।  

समीक्षा अवधिसम्म बैंकले १ खर्ब १८ अर्ब ११ करोड बढी निक्षेप संकलन गरी ९८ अर्ब ९७ करोड बढी कर्जा परिचालन गरेको छ । अघिल्लो वर्षको यही अवधिसम्म १ खर्ब १७ अर्ब ४३ करोड बढी निक्षेप संकलन गरी ९७ अर्ब २२ करोड बढी कर्जा परिचालन गरेको थियो ।  

समीक्षा अवधिका लागि बैंकको प्रतिसेयर नेटवर्थ १५५.०९ रुपैयाँ, पीई रेसियो २४.१३ गुणा, तरलता अनुपात २५.५१ प्रतिशत कायम भएको छ ।