बीमा प्राधिकरणको नेतृत्व दौड, ५० आकांक्षी मैदानमा

​काठमाण्डौ । नेपालको बीमा क्षेत्रको सर्वोच्च नियामक निकाय, नेपाल बीमा प्राधिकरणको रिक्त अध्यक्ष पदका लागि तीव्र प्रतिस्पर्धा देखिएको छ। अर्थ मन्त्रालयले तोकेको अन्तिम समय आज मंगलबार साँझ ५ बजेसम्म ५० जनाले नेतृत्वका लागि आफ्नो दाबेदारी पेस गरेका छन्।

​तत्कालीन अध्यक्ष शरद ओझालाई सरकारले गत २०८२ असार ३० गते निलम्बन गरेपछि लामो समयदेखि कार्यवाहक र अस्थायी नेतृत्वको भरमा चल्दै आएको प्राधिकरणले अब नयाँ नेतृत्व पाउने भएको छ।

​यस पटकको प्रतिस्पर्धा केवल बाह्य विज्ञहरूबीच मात्र सीमित छैन। प्राधिकरणको आन्तरिक संरचना बुझेका र यसअघि नीति निर्माणमा महत्त्वपूर्ण भूमिका खेलेका ३ जना बहालवाला उच्च कर्मचारीहरू आफैँ मैदानमा उत्रिएका छन्। निर्देशकद्वय कमल प्रसाद रेग्मी र पुजन ढुङ्गेल अधिकारी तथा उपनिर्देशक विरोध भट्टले उम्मेदवारी दिएका छन् ।

​राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा गठित सिफारिस समितिले अब प्राप्त ५० वटा आवेदनको सर्टलिष्ट तयार गर्नेछ। सो सूचीबाट उत्कृष्ट ५ जनाको कार्यक्षमता र व्यावसायिक कार्ययोजनाको प्रस्तुति लिइनेछ। 

अन्त्यमा, समितिले ३ जनाको नाम मन्त्रिपरिषदमा सिफारिस गर्नेछ, जसमध्ये एक जनालाई सरकारले आगामी ४ वर्षका लागि प्राधिकरणको नयाँ अध्यक्ष नियुक्त गर्नेछ।