सुनसरी घटनापछि तल्लो तहसम्म सर्वदलीय संयन्त्र बनाउन निर्देशन

 

काठमाण्डौ ।  सुनसरीलगायत विभिन्न जिल्लामा देखिएको तनावपूर्ण अवस्थापछि राजनीतिक दलहरूले प्रदेश, जिल्ला र स्थानीय तहसम्म सर्वदलीय तथा सर्वपक्षीय संयन्त्र गठन गरी तत्काल संवाद सुरु गर्न निर्देशन दिएका छन्।

राष्ट्रिय स्वतन्त्र पार्टीका सभापति रवि लामिछानेको आह्वानमा बुधबार बसेको सर्वदलीय बैठकले समाजमा शान्ति, सामाजिक सद्भाव र नागरिकबीच विश्वासको वातावरण कायम गर्न केन्द्रको पहल मात्र पर्याप्त नहुने निष्कर्ष निकालेको हो।

बैठकपछि जारी संयुक्त वक्तव्य तथा अपिलमा सबै राजनीतिक दलका प्रदेश, जिल्ला र स्थानीय तहका समितिलाई सक्रिय बनाई तत्काल सर्वदलीय बैठक आयोजना गर्न भनिएको छ।

बैठकले स्थानीय तहमा धार्मिक अगुवा, नागरिक समाज, स्थानीय प्रशासन तथा सरोकारवाला पक्षसँग समन्वय गरी तनाव न्यूनीकरण र सामाजिक सद्भाव कायम गर्ने अभियान प्रभावकारी रूपमा सञ्चालन गर्नुपर्नेमा जोड दिएको छ।

हालै सुनसरीलगायतका जिल्लामा विकसित संवेदनशील घटनाक्रमलाई ध्यानमा राख्दै विवाद र असमझदारीलाई स्थानीय स्तरमै संवादका माध्यमबाट समाधान गर्नुपर्ने बैठकको निष्कर्ष छ।

सर्वदलीय बैठकले सामाजिक तथा धार्मिक विषयमा उत्तेजक अभिव्यक्ति नदिन, अफवाह फैलिन नदिन र सम्भावित द्वन्द्व रोक्न राजनीतिक दल तथा स्थानीय नेतृत्वलाई जिम्मेवार भूमिका निर्वाह गर्न पनि आह्वान गरेको छ।

बैठकले शान्ति र सद्भाव कायम राख्ने अभियानलाई केन्द्रबाट मात्र नभई वडा र समुदाय तहसम्म पुर्‍याउनुपर्नेमा जोड दिँदै स्थानीय संयन्त्रलाई नियमित बैठक, सूचना आदानप्रदान र तत्काल समन्वयमा सक्रिय बनाउन निर्देशन दिएको छ।