आकाशिदै सुनको मूल्य, प्रतिऔंस २० डलरले महङ्गियो

काठमाण्डौ । अन्तराष्ट्रिय बजारमा सुनको मूल्य वृद्धि भएको छ । पछिल्लो कारोबार सत्रमा सुनको मूल्य ०.७८ प्रतिशत अर्थात २०.०२ डलरले बढेको छ ।  

यससँगै अन्तराष्ट्रिय बजारमा सुनको मूल्य प्रतिऔंस २ हजार ५७८.२४ डलर कायम भएको छ ।  

अमेरिकी बोन्डको प्रतिफल र डलरको भाउमा आएको गिरावटका कारण लगानीकर्ताले सुनमा लगानी बढाएका छन् । जसका कारण माग बढ्दा सुनको मूल्य बढेको छ ।  

यस्तै अमेरिककी केन्द्रीय बैंक फेडरल रिजर्भले ब्याजदरमा २५ बेसिक प्वइन्ट कटौती गर्न सक्ने सम्भावना बलियो बनेसँगै सुनको मूल्य पछिल्लो समय निरन्तर बढिरहेको छ । अमेरिकी श्रम विभागले राज्यबाट बेरोजगार भत्ता लिनेको सुविधा २ हजारले बढेर कुल २ लाख ३० हजार पुगेको प्रतिवेदन सार्वजनिक गरेको छ । जसका कारण यदि अमेरिकी श्रम बजारको अवस्था थप कमजोर बन्छ भने ब्याजदर कटौती पनि थप बढ्ने आँकलन अर्थशास्त्रीहरुले गरेका छन् ।  

युरोपेली केन्द्र्रीय बैंकले हालै मात्रै ब्याजदर घटाएको छ । यो कटौती यो वर्षमा गरिएको दोस्रोपटक हो । युरोपमा मुद्रास्फिती २ प्रतिशततिर सीमित बन्दैछ । जसका कारण युरो अमेरिकी डलरको तुलनामा बलियो बन्दै गएको छ ।  

यस्तै चाँदीको मूल्य पनि २.८० प्रतिशत अर्थात ०.८३ डलरले बढेर प्रतिऔंस ३०.७५ डलर कायम भएको छ ।