अपर तामाकोशीमा शुक्रबारदेखि आन्दोलन, दोलखाबासी कर्मचारीमाथि विभेद भएको गुनासो

काठमाण्डौ । अपर तामाकोशी हाइडोपावर लिमीटेडमा कार्यरत दोलखा जिल्लाबासी स्थानीय करार कर्मचारी संघर्ष समितिले आफ्ना माग पूरा नभएको भन्दै आन्दोलनको घोषणा गरेको छ ।  

जिल्लाबासी स्थानीय करार कर्मचारी र जिल्लाबाहिरका कर्मचारीहरुलाई कम्पनीले उपलब्ध गराउने सेवासुविधामा विभेद गरिएको भन्दै संघर्ष समितिले विभिन्न माग राखी व्यवस्थापनलाई भदौ २८ देखि असोज ३ गतेसम्मको समयसीमा दिएको थियो । सो समयसीमाभित्र पनि आफ्ना माग पूरा नभएपछि संघर्ष समितिले असोज ४ गतेदेखि आन्दोलनका कार्यक्रम घोषणा गरेको हो । 

दोलखाको गोंगरस्थित पावर प्लान्ट सञ्चालनमा कुनै अवरोध नगर्ने उद्घोषसहित संघर्ष समितिले असोज ४ गतेदेखि ५ गतेसम्म शान्तिपूर्ण धर्ना दिनेछ ।  

असोज ६ गतेदेखि भने माग पूरा नभएसम्म कम्पनीको सवारी साधन सञ्चालनमा रोक लगाइने संघर्ष समितिको उद्घोष छ ।  

समितिका संयोजक रामबहादुर खड्काले अपर तामाकोशीमा कार्यरत दोलखाबासी कर्मचारीहरुलाई विगत २ वर्षदेखि उपलब्ध हुँदै आएको सेवासुविधामा विभेद गरिएको प्रष्ट्याए । 

यस सम्बन्धमा कम्पनी व्यवस्थापनलाई  जिल्लाबाहिरका कम्पनीका कर्मचारीहरुले खाईपाई आएको सेवासुविधा नघटाई दोखला जिल्लाबासी र जिल्ला बाहिरका कम्पनीका कर्मचारीहरुमा भएको विभेद अन्त्य गरी दोलखा जिल्लाबासी र जिल्ला बाहिरका कर्मचारीहरुले पाउने सेवासुविधामा समानताका लागि पटक पटक अनुरोध गरेता पनि व्यवस्थापनले सम्बोधन नगरेको उनको गुनासो छ ।  

आफ्ना मागको सुनुवाई नभएपछि दोलखा जिल्लाबासी करार कर्मचारीहरु भदौ २४ गतेको भेलाले संघर्ष समिति गठन गरेको थियो । समितिले दोलखा जिल्लाबासी केही कर्मचारीहरुको हालै कटौती  गरिएको खाईपाई आएको सेवासुविधाको समेत सोधभर्नासहित कटौति गरेको सेवासुविधा उपलब्ध गराउनुपर्ने माग समेत अगाडि सारेको छ ।