सेयर बजार घट्दा पूँजीगत लाभकर पनि ३९% ले घट्यो, भदौमा सरकारले उठायो साढे २ अर्ब

काठमाण्डौ । सरकारले भदौ महिनामा सेयर बजारबाट साढे २ अर्ब रुपैयाँ बढीको पूँजीगत लाभकर संकलन गरेको छ । सीडीएस एण्ड क्लियरिङको तथ्यांकअनुसार भदौ महिनामा सरकारले २ अर्ब ५७ करोड ९४ लाख रुपैयाँ पूँजीगत लाभकर उठाएको हो ।  

यो रकम साउनको तुलानमा ३९ प्रतिशतले कम हो । साउन महिनामा सेयर बजारबाट राज्यलाई ४ अर्ब २३ करोड ७८ लाख ६१ हजार रुपैयाँ बराबरको पूँजीगत लाभकर गएको थियो । साउन महिनाभरमा नेप्सेमा ४१४ अर्ब हाराहारीमा सेयर कारोबार भएको थियो । यो महिनामा नेप्से परिसूचक ६९०.२२ अंकले बढेको थियो।   ।    

तर भदौ महिनामा नेप्से परिसूचकमा उच्च गिरावट आएपछि सरकारले भने साढे २ अर्ब बढीको राजश्व संकलन गर्न सफल भएको छ । गत महिना सेयर बजार १४ प्रतिशत अर्थात ४२० अंकले घट्यो ।  

सीडीएस एण्ड क्लियरिङका अनुसार भदौ महिनामा सरकारले व्यक्तिगत दीर्घकालीन पूँजीगत लाभकर ७३ करोड ३९ लाख रुपैयाँ र व्यक्तिगत अल्पकालीन पूँजीगत लाभकर १ अर्ब ५३ करोड ८४ लाख रुपैयाँ संकलन गरेको छ ।  

त्यस्तै कर्पोरेट पूँजीगत लाभकर ३० करोड ४० लाख रुपैयाँ र स्टक डिलरको पूँजीगत लाभकर ३० लाख ३९ हजार रुपैयाँ संकलन भएको छ ।

चालु आर्थिक वर्षको साउन र भदौमा गरी कुल ६ अर्ब ८१ करोड ४७ लाख रुपैयाँ पूँजीगत लाभकर संकलन भएको सीडीएस एण्ड क्लियरिङको तथ्यांकले देखाउँछ ।