काठमाण्डौ । पछिल्लो १८ घण्टामा इटलीमा मृत्यु हुने कोरोना संक्रमितको संख्या ८८९ थपिएसँगै यो भाइरसबाट सो देशमा ज्यान गुमाउनेको संख्या १० हजार माथि पुगेको छ । 

मार्च २८ को १८ घण्टाको अवधिमा इटलीमा ८८९ संक्रमितले ज्यान गुमाएका हुन् । योसँगै त्यहाँ ज्यान गुमाउनेको संख्या १० हजार २३ पुगेको छ । 

ज्यान गुमाउनेको संख्यासँगै इटलीमा कोरोनाबाट संक्रमित हुनेको संख्या समेत बढिरहेको छ । यो १८ घण्टाभित्र मात्र त्यहाँ ६ हजार नयाँ संक्रमित फेला परेका छन् । कुल संक्रमितको संख्या बढेर ९२ हजार ५ सय नजिक पुगेको छ । 

संक्रमितमध्ये अझै पनि ३८०० बढी जटिल अवस्थामा छन् । 

अन्य दिन झै यो १८ घण्टामा इटलीपछि सबैभन्दा बढी संक्रमितको मृत्यु हुने देशमा स्पेन दोश्रो नम्बरमा छ । यो अवधिमा स्पेनमा समेत ६७४ ले ज्यान गुमाएका छन् । योसहित सो देशमा कोरोना संक्रमणबाट ज्यान गुमाउनेको संख्या ६ हजार ५२९ पुगेको छ। 

स्पेन र इटलीसँग सीमा जोडिएको फ्रान्समा समेत संक्रमणको अवस्था भयावह बन्न थालेको छ । पछिल्लो १८ घण्टामा मात्रै फ्रान्समा ३१९ संक्रमितको मृत्यु भई कुल मृतकको संख्या २३१४ पुगेको छ । यो दिन फ्रान्समा ४६०० बढी नयाँ संक्रमित भेटिएका छन् । योसहित फ्रान्समा कोरोनाबाट संक्रमित हुनेको कुल संख्या ३७ हजार ५०० भन्दा बढी पुगेको छ । 

यो समाचार तयार पार्दासम्म अमेरिकामा समेत मृत्यु हुनेहरुको लिस्टमा २४१ थपिएका छन् । योसहित अमेरिकामा समेत ज्यान गुमाउनेको संख्या २ हजार नजिक पुगेको छ । यो दिन अमेरिकामा सबैभन्दा बढी १२ हजार २०० बढी नयाँ संक्रमित फेला परेका छन् । यहाँ कुल संक्रमितको संख्या १ लाख १६ हजार माथि पुगेको छ । 

इरानमा पनि यो दिन १३९ थप संक्रमितको मृत्यु भएको छ । यहाँ मृतकको संख्या २ हजार ५०० माथि पुगिसकेको छ । 

चीनमा थप ३ संक्रमितको मृत्यु भएको छ भने त्यहाँ ५४ जना नयाँ संक्रमित फेला परेका छन् । 

बेलायतमा समेत भाइरसको संक्रमण तीव्र भएको छ । मृत्यु दर समेत त्यहाँ ह्वात्तै बढेको छ । बेलायतमा पछिल्लो १८ घण्टाको अवधिमा २६० संक्रमितको मृत्यु भएको छ । योसँगै बेलायतमा कोरोनाबाट ज्यान गुमाउनेको संख्या १ हजार १९ पुगेको छ । 

यो अवधिमा नेदरल्याण्डमा ९३ जना, जर्मनीमा ५२ जना, बेल्जियममा ६४ जना, पोर्चुगलमा २४ जना, डेनमार्कमा १३ जना, इण्डोनेशियामा १५, फिलिपिन्समा १४ जनाको मृत्यु भएको छ । 

यो समाचार तयार पार्दासम्म कोरोना संक्रमितबाट विश्वभर मृत्यु हुनेको संख्या ३० हजार २९९ पुगेको छ । कुल संक्रमितको संख्या ६ लाख ५० हजार ७०० माथि पुगेको छ । 

पछिल्लो १८ घण्टामा मात्र विश्वभर २९५७ संक्रमितको ज्यान गएको छ । ५४ हजार ४०० बढी नयाँ संक्रमित भेटिएका छन् भने कुल संक्रमितमध्ये २५ हजार २०० बढीको अवस्था गम्भीर छ ।