काठमाण्डौ । नेपालमा पहिलोपटक आयोजना हुन लागेको फ्रेन्चाइज फुटबल प्रतियोगिता ‘नेपाल सुपरलिग’को अफिसियल मेडिकल पार्टनरका रुपमा नर्भिक इन्टरनेसनल हस्पिटल अनुबन्धित भएको छ। 

नेपाल सुपरलिगका तर्फबाट नेपाल स्पोर्टस एन्ड इभेन्ट्स म्यानेजमेन्ट र नर्भिक अस्पतालबीच नेपाल सुपर लिगको अफिसियल मेडिकल पार्टनर अनुबन्धको सम्झौतामा हस्ताक्षर भएको हो। सम्झौतामा नर्भिकका तर्फबाट प्रबन्ध निर्देशक मेघा चौधरी र नेपाल स्पोर्टस एन्ड इभेन्ट्स म्यानेजमेन्टका तर्फबाट सो कम्पनीका डिरेक्टर श्रेयांश कार्कीले हस्ताक्षर गरेका छन्। 

सात टिमको फ्रेन्चाइज फुटबल प्रतियोगिता स्वास्थ्यका सबै मापदण्ड पालना गरी वैशाख ११ गतेदेखि दशरथ रंगशालामा हुँदैछ। 

नेपाल सुपर लिगको अवधिभर दशरथ रंगशालामा उपस्थित खेलाडी, आयोजकका सदस्यमा देखा पर्नसक्ने कुनै आपतकालीन स्वास्थ्य समस्या समाधानका लागि नर्भिकका तर्फबाट ३ मेडिकल अफिसरसहितको टिम मैदानमै तैनाथ रहनेछ। आधारभूत औषधि तथा अन्य स्वास्थ्य सामग्रीसहितको नर्भिकको लोगोअंकित मेडिकल ब्याग खेलमा सहभागी प्रत्येक टिमका लागि उपलब्ध गराइने सम्झौतामा उल्लेख छ। 

नर्भिकले यो अवधिमा खेलाडी तथा आयोजकका कुनै सदस्यको पीसीआर टेस्ट गर्नु परे विशेष छुटमा त्यस्तो सेवासमेत उपलब्ध गराउनेछ। कुनै खेलाडीमा कोभिड संक्रमण देखिए तिनीहरुको नर्भिकमा उपचार गराउने क्रममा लाग्ने बेड चार्जमा २० प्रतिशत छुटको सुविधासमेत उपलब्ध हुनेछ। 

रंगशालामा सम्भव नहुने उपचारका लागि कुनै खेलाडी, दर्शक वा आयोजकका सदस्यलाई अस्पताल लैजानु परे त्यहाँ लाग्ने सबै उपचार खर्च स्वयं बिरामीले व्यहोर्नुपर्ने सम्झौतामा उल्लेख छ। कुनै खेलाडीलाई उपचारका लागि अस्पताल लैजानु परे एक्स–रे र एमआरई सेवामा नर्भिकले ५ प्रतिशत छुट दिनेछ। 

सम्झौतापछि प्रतिक्रिया दिँदै नर्भिक इन्टरनेसनल हस्पिटलकी प्रबन्ध निर्देशक मेघा चौधरीले नेपालमै पहिलोपटक आयोजना हुन लागेको फ्रेन्चाइज फुटबल प्रतियोगिता नेपाल सुपर लिगसँग सहकार्य गर्न पाउँदा खुसी लागेको बताइन्। हरेक क्षेत्र र वर्गका मानिसहरुको स्वास्थ्य सेवालाई प्राथमिकतामा राखेर अगाडि बढिरहेको नर्भिकले आगामी दिनमा यस्तै अन्य इभेन्ट्सहरुमा समेत सहकार्य गर्ने नीति लिएको उनको भनाइ छ। 

नेपाल स्पोर्टस एन्ड इभेन्ट्स म्यानेजमेन्टका तर्फबाट सो कम्पनीका डिरेक्टर श्रेयांश कार्कीले नेपालमा गुणस्तरीय स्वास्थ्य सेवाको जग बसालेको नर्भिकजस्तो अन्तर्राष्ट्रियस्तरको सेवा दिने अस्पतालसँग नेपालको पहिलो फ्रेन्चाइज फुटबल लिगमार्फत सहकार्य गर्ने मौका पाएकोमा खुसी लागेको बताए। ‘यो अवसरका लागि हामी नर्भिकप्रति आभार प्रकट गर्न चाहन्छौँ’, उनले भने।