काठमाण्डौ । हालै आईपीओ बिक्री गरी बाँडफाँड गरेको मनकामना स्मार्ट लघुवित्त वित्तीय संस्था लिमिटेडको सेयर आज सोमबारबाट धितोपत्र दोस्रो बजारमा कारोबार खुल्न सकेन। 

स्पेसल प्रि–ओपन सेसनमा आज नेपाल स्टक एक्सचेन्ज (नेप्से) तोकेको ओपनिङ रेन्जभित्रै सेयर किनबेच नभएपछि मनकामना स्मार्टको सेयर नियमित समयका लागि कारोबार खुल्न नसकेको हो। अब भोलि स्पेसल प्रि–सेसनमा नेप्सेले तोकेको रेन्जभित्र सेयर किनबेच भएमा नियमित समयका लागि कारोबार खुल्नेछ। 

हिजो आइतबार मनकामना स्टमार्टको नेप्सेमा सेयर सूचीकरण सम्झौता भएको थियो। कुनै पनि कम्पनीको सेयर नेप्सेमा सूचीकरण भएको दोस्रो दिनबाट कारोबार आउने गर्छ। तर स्पेसल प्रि–ओपन सेसनमा नेप्सेले तोकेको रेन्जमा सेयर किनबेच नभएपछि नियमित कारोबार नखुलेको हो। 

यो लघुवित्तलाई नेप्सेले एमकेएलबी कारोबार संकेत प्रदान गरेको छ भने पहिलो करोबारका लागि न्यूनतम ११०.८४ रुपैयाँदेखि अधिकतम ३३२.५२ रुपैयाँ ओपनिङ रेन्ज तोकेको थियो। 

नेप्सेमा मनकामना स्मार्टको १०० रुपैयाँ अंकित दरका कुल १२ लाख ११ हजार ५०० कित्ता सूचीकृत भएको छ। जसमा संस्थापकको ८ लाख २२ हजार ५०० कित्ता र सर्वसाधारणको ३ लाख ८९ हजार कित्ता रहेका छन्।

यो लघुवित्तले गत असार १७ गतेदेखि असार २१ गतेसम्म आईपीओ निष्कासन गरेको छ। आईपीओ बाँडफाँड असार २८ गते गरिएको थियो।