विकास बैंकमा मुक्तिनाथको एकछत्र राज, गरिमा र महालक्ष्मी पछ्याउँदै(टेबलसहित)

काठमाण्डौ । राष्ट्रिय स्तरका विकास बैंकहरुमा फेरि पनि मुक्तिनाथ विकास बैंकले नै अधिकांश वित्तीय सूचकमा अरुलाई टपेर नम्बर वानको पोजिसन कब्जा गरेको छ । 

मुक्तिनाथ विकास बैंकका वित्तीय सूचकतर्फका प्रगति कतिपय वाणिज्य बैंकको भन्दा पनि राम्रो छ । 

चालु आर्थिक वर्षको तेश्रो त्रैमासमा ४ वटा वाणिज्य बैंकलाई समेत टपेर मुक्तिनाथ विकास बैंकले १ अर्ब २ करोड खूद नाफा आर्जन गरेको छ । यो अवधिमा मुक्तिनाथको नाफा सेञ्चुरी बैंक, सिभिल, बैंक अफ काठमाण्डू र लक्ष्मी बैंकको भन्दा राम्रो देखिएको हो । 

वाणिज्य बैंकहरुलाई नै नाफा लगायतका सूचकमा टक्कर दिंदै आएको मुक्तिनाथ विकास बैंकले अस्तित्वमा रहेका ८ वटा विकास बैंकमा अधिकांश सूचकमा नम्बर वान पोजिसन बनाउने सफलता पाएको हो । 

मुक्तिनाथ विकास बैंकले ९ महिनाको अवधिमा १ अर्ब माथि नाफा कमाउने बैंकको इतिहास गत साल नै बनाएको थियो । त्यसलाई यो वर्ष पनि निरन्तरता दिएको छ । 

यस्तै संचालन मुनाफा, खूद ब्याज आम्दानी, डिपोजिट, कर्जा, प्रतिसेयर आम्दानी, खराब कर्जा अनुपात जस्ता महत्वपूर्ण सूचकमा समेत मुक्तिनाथ विकास बैंक अगाडि देखिएको छ । 

नाफा तथा अन्य सूचकलाई हेर्दा मुक्तिनाथ विकास बैंकलाई गरिमा विकास बैंक र महालक्ष्मी विकास बैंकले पछ्याइरहेका देखिन्छ । 

समीक्षा अवधिमा गरिमा विकास बैंकले ७८ करोड ४६ लाख बढी नाफा आर्जन गरेकोमा महालक्ष्मी विकास बैंकले ७१ करोड ४२ लाख नाफा आर्जन गरेको छ । 

मुक्तिनाथको संचालन मुनाफा १ अर्ब ४६ करोड रहेकोमा गरिमाको १ अर्ब १२ करोड र महालक्ष्मीको १ अर्ब रहेको छ । मुक्तिनाथले २ अर्ब ४० करोड खूद ब्याज आम्दानी गर्दा गरिमाले १ अर्ब ८५ करोड र महालक्ष्मीले १ अर्ब ३४ करोड आर्जन गरेको छ । 

समीक्षा अवधिमा मुक्तिनाथ विकास बैंकले ९९ अर्ब बढीको निक्षेप संकलन गरी ८७ अर्ब बढी कर्जा परिचालन गरेको छ । गरिमाले ६६ अर्ब ८६ करोड बढी निक्षेप संकलन गरी ५९ अर्ब ८२ करोड बढी कर्जा परिचालन गरेको छ । महालक्ष्मीले भने ४१ अर्ब ७७ करोड बढी निक्षेप संकलन गरी ३८ अर्ब ८ करोड बढी कर्जा परिचालन गरेको छ । निक्षेप संकलमा महालक्ष्मी विकास बैंकलार्य ज्योति विकास बैंक र सांग्रिला डेभलपमेन्ट बैंकले उछिनेका छन् । 
रिजर्ब लुम्बिनी विकास बैंकको बलियो देखिएको छ । त्यसपछि क्रमशः महालक्ष्मी विकास बैंक, मुक्तिनाथ र गरिमाको देखिन्छ । 

समीक्षा अवधिमा वार्षिकीकृत प्रतिसेयर आम्दानीमा मुक्तिनाथ पहिलो बन्दा महालक्ष्मी रु. २३.७४ सहित दोश्रो, गरिमा रु. २२.८४ सहित तेश्रो तथा कामना सेवा रु.२१.४१ सहित तेश्रो स्थानमा छन् । 

सबैभन्दा धेरै खराब कर्जा महालक्ष्मी विकास बैंकमा रहेको छ । यो बैंकमा २.८९ प्रतिशत खराब कर्जाको अनुपात छ । कामना सेवामा पनि २.२० प्रतिशत खराब कर्जाको अनुपात छ । खराब कर्जाको अनुपात सबैभन्दा कम मुक्तिनाथ विकास बैंकमा ०.१७ प्रतिशत रहेको छ । त्यसपछि गरिमा र सांग्रिला डेभलपमेन्ट बैंकमा निकै कम क्रमशः १.०२ र १.२० प्रतिशत रहेको छ । 

यी ८ विकास बैंकको चालु आर्थिक वर्षको तेश्रो त्रैमासको अपरिस्कृत वित्तीय विवरणका आधारमा तयार पारिएको टेबल हेर्नुहोस्: