साना किसान र आरएमडीसी लघुवित्तको मर्जरलाई राष्ट्र बैंकको अन्तिम स्वीकृति

काठमाण्डौ । नेपाल राष्ट्र बैंकले साना किसान विकास लघुवित्त र आरएमडीसी लघुवित्त वित्तीय संस्थाबीचको मर्जरलाई अन्तिम स्वीकृति प्रदान गरेको छ। 

राष्ट्र बैंकले जेठ २४ गते पत्र पठाउँदै यी दुवै लघुवित्तको मर्जरलाई अन्तिम स्वीकृति प्रदान गरिएको जानकारी गराएको हो। 

गत भदौ ३१ यी दुई संस्थाबीच एकआपसमा गाभिने उद्देश्यले प्रारम्भिक समझदारी भएको थियो । मर्जरका लागि सेयर आदानप्रदान अनुपात १००ः८७ कायम हुने सहमति भएको छ । यसको अर्थ आरएमडीसी लघुवित्तको हाल १०० कित्ता सेयर हुनेले मर्जरपछि बन्ने संस्थाको ८७ कित्ता सेयर पाउनेछन्।
मर्जरपछि एकीकृत वित्तीय संस्थाको नाम ‘साना किसान आरएमडीसी लघुवित्त वित्तीय संस्था लिमिटेड’ हुने सहमति भएको छ। 

मर्जरपछि संस्थाको हालको अलग–अलग पुँजीगत आधारको झन्डै दोब्बर पुँजीगत आधार भई एक सबल पुँजी भएको उत्कृष्ट स्तरको लघुवित्त वित्तीय संस्था बन्ने बताइएको छ। मर्जरपछि मुलुकको वर्तमान माग अनुसारको कृषि तथा लघुवित्तको क्षेत्रमा लगानी गर्ने एक विशिष्टिकृत वित्तीय संस्थाको रुपमा खडा हुन आधार तयार हुने र नेपाल सरकार तथा राष्ट्रिय एवम् अन्तर्राष्ट्रिय सहयोगी संघसंस्थाहरुको कृषि तथा ग्रामीण विकास अभियानमा एक सबल, सक्षम र विश्वासिलो साझेदारको रुपमा स्थापित हुने आधारशिला तयार हुने विश्वास संस्थाहरुले गरेका छन्।