काठमाण्डौ । निषेधाज्ञाको अवधिमा विद्यार्थीको समयलाई आकर्षक तथा उत्पादक बनाउने उद्देश्यका साथ ‘इसेवा भर्चुअल फिस्टा’ आयोजना गरिएको छ। 

भर्चुअल प्लेटफर्मका माध्यमबाट मुलुकभरका करिब १० हजार विद्यार्थीलाई एकै ठाउँमा ल्याउने उद्देश्यका साथ गत शुक्रबार (जेठ ७ गते) बाट यो कार्यक्रम आयोजना गरिएको हो। यस भर्चुअल फिस्टामा स्नातक तथा स्नातोत्तरसम्मका विद्यार्थी उपस्थित हुन सकिनेछ। यस कार्यक्रममा कार्यशाला तथा  अन्तरक्रियाका शत्रहरू सञ्चालन हुनेछन्। 

यस कार्यक्रमले विद्यार्थीलाई महामारीको त्रासबाट टाढा राख्नको लागि कार्यशाला र गतिविधिहरूमा संलग्न गराउने, गहिरो तथा अर्थपूर्ण छलफल गर्न प्रोत्साहित गर्न र व्यक्तिगत तथा व्यावसायिक जीवनको विभिन्न पक्षहरूमा सान्दर्भिक विचारहरू प्रस्तुत गर्न तथा सीप विकासका अवसर प्रदान गर्ने  अपेक्षा राखिएको छ। यसबाट विद्यार्थीका लागि ब्यक्तिगत व्यावसायिक दृष्टिकोणबाट अवसरहरू सिकाउन तथा युवाहरुले व्यवसाय स्थापना गर्नको लागि अवसर तथा प्रशिक्षण प्रदान गर्नेछ। 

नेपालको पहिलो र अग्रणी भुक्तानी सेवा प्रदायक इसेवाको मुख्य प्रायोजनामा फोनिक्स् कलेज अफ म्यानेजमेन्ट, युनिभर्सल कलेज र न्यू समिट कलेजले आयोजना गरेको यस अन्तरक्रिया कार्यक्रममा वित्तीय साक्षरता, महामारीको समयका अग्रपंतिका नायकलाई सम्मान, सेयर बजार प्रशिक्षण, एक्सेल प्रशिक्षण, प्रस्तुति प्रतियोगिता, सार्वजनिक मन्तव्य, प्रत्यक्ष संगीत र आइडिया पिचिंग प्रतियोगिता जस्ता कार्यक्रम समावेश छन्। 

कार्यक्रम जेठ २१ गते शुक्रबारसम्म सञ्चालन हुनेछ।  कार्यक्रममा एमएस टिम्स् तथा आयोजक कलेजको आधिकारिक फेसबुक पेज मार्फत प्रतक्ष्य प्रसारण हुनेछ। सोही फेसबुक पेजमा गई आफू सहभागीसमेत हुन सकिनेछ।