टोयोटाको विश्वव्यापी सवारी बिक्री लगातार चौथो महिना घट्यो, चीन र मध्यपूर्वको कमजोर माग मुख्य कारण

काठमाण्डौ । जापानी अटो निर्माता टोयोटा मोटर कर्पोरेशनको विश्वव्यापी सवारी बिक्री मे महिनामा लगातार चौथो महिना घटेको छ। चीन र मध्यपूर्वमा बिक्रीमा आएको तीव्र गिरावटका कारण कम्पनीको समग्र बिक्री प्रभावित भएको हो।

कम्पनीका अनुसार मे महिनामा विश्वभर ८ लाख ३४ हजार २७९ युनिट सवारी बिक्री भएको छ, जुन अघिल्लो वर्षको सोही अवधिको तुलनामा ७.२ प्रतिशतले कम हो। विदेशी बजारमा बिक्री ९.६ प्रतिशतले घट्दा, जापानभित्रको बिक्री भने ११.१ प्रतिशतले बढेको छ। घरेलु बजारमा र्याभ४ र बीजेट४एक्स मोडलको उच्च मागले बिक्री वृद्धि भएको कम्पनीले जनाएको छ।

क्षेत्रगत रूपमा चीनमा बिक्री ३१.७ प्रतिशतले घटेको छ। कडा प्रतिस्पर्धा र चुनौतीपूर्ण बजार अवस्थाले त्यहाँको कारोबार प्रभावित भएको हो। त्यस्तै, मध्यपूर्वमा बिक्री ३८.६ प्रतिशतले घटेको छ भने टोयोटाको सबैभन्दा ठूलो बजार अमेरिकामा बिक्री ०.६ प्रतिशतले मात्रै घटेको छ।

उत्पादनतर्फ पनि कम्पनीको विश्वव्यापी उत्पादन ५.५ प्रतिशतले घटेको छ। अमेरिकामा उत्पादन ३.८ प्रतिशत र एसियामा १३.३ प्रतिशतले घटे पनि जापानमा उत्पादन वृद्धि भएको कम्पनीले जनाएको छ।

टोयोटाले सार्वजनिक गरेको तथ्यांकमा यसको लक्जरी ब्रान्ड लेक्ससको बिक्री तथा उत्पादनसमेत समावेश गरिएको छ।