अन्तरिक्षमा सोलार स्टेशन निर्माण गर्दै चीन, असीमित उर्जा उत्पादन हुने

काठमाण्डौ । चीनले अन्तरिक्षमा सोलार स्टेशन निर्माण गर्ने भएको छ । चाईनिज एकेडेमी अफ इन्जिनियरिङ(सीएई)का सदस्य तथा रकेट वैज्ञानिक लङ लिहाओले चीनले अन्तरिक्षमा सोलार स्टेशन निर्माणबारे योजना बनाईरहेको बताएका हुन् ।  

अन्तरिक्षमा आधारित सोलार पावर(एसबीएसपी)स्टेशनले प्यानलहरुमा सौर्य किरणलाई केन्द्रित गर्न ठूला ऐनाहरुको प्रणालीको प्रयोगबाट काम गर्ने जनाइएको छ । जसपश्चात यसले विद्युत उत्पादन गर्नेछ । यस्तो विद्युतलाई माइक्रोवेभ रेडियसनमा परिणत गरिने र पृथ्वीमा जडान गरिएको एन्टीनामा पठाइने छ ।  

एसबीएसपी प्यानल आम सोलार प्यानलभन्दा धेरैनै भरपर्दो हुने र यसलाई मौसमको अवस्था र रातको समयले समेत प्रभाव नपार्ने जनाइएको छ । पृथ्वीमा भन्दा अन्तरिक्षमा सूर्यको ताप बढी हुने हुँदा यसले भूमिगत प्यानलभन्दा बढी विद्युत उत्पादन गर्न सक्छ ।  

नासाले हालै गरेको एक अध्ययनअनुसार अन्तरिक्षमा आधारित सोलार पावरले एक वर्षका लागि ९९ प्रतिशत उर्जा उत्पादन गर्न सक्छ । 

लङ लिहाओले यसरी एक वर्षमा संकलन गरिने उर्जा पृथ्वीमा मौज्जाद रहेको कुल तेलबराबर हुने दाबी समेत गरेका छन् । चीनको यो योजना सफल भयो भने नविकरणीय उर्जाको क्षेत्रमा क्रान्तिकारी सफलता हुने जनाइएको छ । तर यो योजना सफल हुनमा केही कठिनाईहरु आउन सक्ने जनाइएको छ ।