शिखर पावरको आइपीओमा १६.६८ गुणा बढी आवेदन, पौने २६ लाखको हात खाली हुने पक्का !

काठमाण्डौ । शिखर पावर डेभलपमेन्ट लिमिटेडको आइपीओमा आज अन्तिम दिनसम्म १६.६८ गुणा बढी आवेदन परेको छ । सिडिएस एण्ड क्लियरिङ्ग लिमिटेडका अनुसार अन्तिम दिनसम्म कम्पनीको आइपीओमा २७ लाख ६५ हजार ९४८ जनाले आवेदन दिएका छन् ।  

कम्पनीको आइपीओमा कुल ३ अर्ब ७ करोड ३३ लाख ९३ हजार रुपैयाँ बराबरको ३ करोड ७ लाख ३३ हजार ९३० कित्ताका लागि आवेदन परेको छ, जुन यो मागभन्दा १६ गुणा बढी आवेदन हो ।

मागभन्दा बढी आवेदन परेकाले कम्पनीको आइपीओ गोलाप्रथाद्वारा बाँडफाँड हुनेछ । कम्पनीले कुल १८ लाख ४२ हजार ६०० कित्ता सेयर सर्वसाधारणहरुका लागि निष्कासन गरेको हो ।   

कम्पनीले १० कित्ताका दरले सेयर बाँडफाँड गर्दा १ लाख ८४ हजार २६० जनाले प्राप्त गर्नेछन् । यसर्थमा आवेदन दिएका कुल २७ लाख ६५ हजार आवेदकमध्ये २५ लाख ८१ हजार भन्दा बढीको हात खाली हुने निश्चित देखिएको छ ।