इन्द्रचोक–भेडासिंह क्षेत्रमा सुनचाँदी पसल लुटपाट प्रयास, पेस्तोलसहित तीन युवक पक्राउ

काठमाण्डौं । राजधानीको व्यस्त व्यापारिक क्षेत्र इन्द्रचोक–भेडासिंहमा रहेको एक सुनचाँदी पसलमा पेस्तोल देखाउँदै लुटपाटको प्रयास गरेको आरोपमा प्रहरीले तीन जना युवकलाई पक्राउ गरेको छ।

गत वैशाख १७ गते दिउँसो नैना एन्ड इशान ज्वेलरीमा पेस्तोल देखाएर लुटपाट गर्ने प्रयास भएको थियो। तर पसलकी सञ्चालक बबिता रौनियारले प्रतिकार गरेपछि आक्रमणकारीहरू घटनास्थलबाट भागेका थिए।

जिल्ला प्रहरी परिसर काठमाडौंका एसपी पवन भट्टराईका अनुसार अनुसन्धान र खोजतलासपछि तीन जनालाई पक्राउ गरिएको हो।  

पक्राउ पर्नेमा ललितपुर महालक्ष्मी नगरपालिका–६ का २९ वर्षीय हरिकृष्ण महर्जन, सोही ठाउँका विकेश राजवाहक र अरुण भुजेल रहेका छन्।

एसपी भट्टराईका अनुसार “विकेश राजवाहक र अरुण भुजेललाई प्रहरी टोलीले पक्राउ गरेको हो भने हरिकृष्ण महर्जनलाई अपराध अनुसन्धान कार्यालयको टोलीले नियन्त्रणमा लिएको हो।”  

उनका अनुसार उनीहरू अन्य आपराधिक घटनामा पनि संलग्न रहेको आशंका छ र थप अनुसन्धान भइरहेको छ।

प्रहरीले अरुण भुजेलको साथबाट घटनामा प्रयोग भएको पेस्तोल बरामद गरेको जनाएको छ।  

त्यस्तै, हरिकृष्ण महर्जनले लुटपाटका क्रममा लगाएको कपडा घटनास्थल नजिकै फालेर आफ्नो पहिचान लुकाउने प्रयास गरेको पनि अनुसन्धानमा देखिएको छ।

घटनाबारे थप अनुसन्धान जारी रहेको प्रहरीले जनाएको छ।