शरीरको ५-६% भाग जलेपछि अर्थमन्त्री र मेयर चिकित्सकको उच्च निगरानीमा, बलूनमा हाइड्रोजन ग्यास भरिनुको कारण खोज्दै प्रहरी

काठमाण्डौ । शनिवारदेखि पोखरामा सुरु हुने ’पोखरा भ्रमण वर्ष २०२५’ को समुद्घाटनका क्रममा बलुन बिस्फोट भएर घाइते हुन पुगेका अर्थमन्त्री विष्णु पौडेल र पोखरा महानगरका मेयर धनराज आचार्यको किर्तिपुरस्थित बर्न अस्पतालमा उपचार भइरहेको छ ।  

अस्पतालले जारी गरेको विज्ञप्तिअनुसार अर्थमन्त्री र मेयर दुवैको सघन उपचार कक्षमा राखेर उपचार जारी राखिएको छ । बेलुन विस्फोट भई फैलिएको आगोका कारण दुवैको ५–६ प्रतिशत भाग जलेको बताइएको छ । 

किर्तिपुर अस्पतालका निर्देशक डा. किरणकिशोर नकर्मीले एक विज्ञप्ति जारी गरी भनेका छन्उ-'हाँहरुको प्रारम्भिक मूल्याङ्कनअनुसार ५–६ प्रतिशत जलेको, तर अनुहारमा जल भएकोले श्वासनली र फोक्सोमा असर पर्नसक्ने सम्भावना रहेकोले उच्च निगरानीमा उपचार गर्नुपर्ने आवश्यकता देखिन्छ।' 

उता, बेलुन विस्फोट भएको विषयमा प्रहरीले अनुसन्धानलाई तीव्र पारेको छ । कास्की जिल्ला प्रहरी कार्यालय स्रोतका अनुसार बलून आकाशमा उडाउनका लागि हाइड्रोजन भरिएको थियो र त्यसलाई आगोको झिल्काले भेट्दा उद्घाटनको क्रममा विस्फोट हुन पुगेको थियो । 

विज्ञहरुका अनुसार आकाशमा उडाइने बलूनमा हिलिअम ग्यासको प्रयोग सुरक्षित मानिन्छ। तर हिलिअम महँगो पर्ने भएका कारण बलून भर्ने ठाउँहरूमा हाइड्रोजनको प्रयोग गर्ने गरिएको र पोखरामा पनि यस्तै गरिँदा दुर्घटना भएको प्रहरीको भनाई छ ।  

मुखले हावा भरेर पनि बलुन फुलाउन सकिने अवस्थामा हाइड्रोजनकै प्रयोग भएको विषयमा समेत अनुसन्धान भइरहेको प्रहरीले जनाएको छ ।  

प्रारम्भिक रुपमा हाइड्रोजनका कारण विस्फोट भएको निश्कर्ष निकाले पनि नियतको विषयमा पनि आज कुनै टुंगोमा पुग्न सकिएन । कास्की प्रहरीका एक अधिकारीले भने ।