राप्रपाका नेता राणा र मिश्रसहित ४१ जनालाई ५ दिन थप हिरासतमा राख्न अनुमति, स्वागत नेपाल रिहा

काठमाण्डौ । जिल्ला अदालत काठमाण्डौले तीनकुनेमा चैत १५ गते भएको राजावादी प्रदर्शनमा दोषी भनी पक्राउ गरिएका राप्रपाका नेताद्वय धवलशमशेर राणा र रवीन्द्र मिश्रसहित ११ जनालाई थप ५ दिन हिरासतमा राख्न प्रहरीलाई अनुमति दिएको छ ।  

जिल्ला अदालतका न्यायाधीश तारादेवी महर्जनको एकल इजलासले राणा र मिश्रसहित ११ जनालाई थप ५ दिन हिरासमा राखी आवश्यक अनुसन्धान गर्न अनुमति दिएको हो । 

राणा र मिश्रलाई चैत १५ गते राति नै सो तीनकुने घटनाका घाइतेहरुलाई अस्पतालमा गएर भेटिरहेको क्रममा प्रहरीले पक्राउ गरेको थियो । बाँकीलाई सोही रात राजधानीका विभिन्न स्थानबाट पक्राउ गरिएको थियो ।  उनीहरुविरुद्ध राज्यविरुद्धको कसुरमा अनुसन्धान भइरहेको प्रहरीले जनाएको छ ।  

यस्तै, अदालतले पक्राउ परेका अन्य ३० जनालाई चाहिँ आपराधिक उपद्रवसम्बन्धी अपराधमा ५ दिन हिरासतको अवधि थप्न अनुमति दिएको छ । 

चैत १५ गते तीनकुनेमा राजावादीहरुको प्रदर्शन भड्किएर हिंसात्मक बन्दा २ जनाको मृत्यु भएको थियो भने दर्जनौं घाइते भएका थिए । तीनकुने क्षेत्रका दर्जनौ निजी घर, पसल, व्यवसायिक मल, रेष्टुरा, सञ्चारगृह लगायतमा तोडफोड र आगजनी भएको थियो । अराजक समूहले राजधानीका विभिन्न स्थानका सरकारी कार्यालय, एकीकृत समावादीको पार्टी कार्यालय, सरकारी तथा निजी सवारी साधनमा समेत तोडफोड र आगजनी गरेको थियो ।  

यसैबीच, राजावादी आन्दोलनका प्रवक्ता समेत रहेका वरिष्ठ अधिवक्ता स्वागत नेपाललाई भने प्रहरीले आज छाडेको छ । तीनकुने घटनामा उनको संलग्नता नदेखिएको र त्यहाँको प्रदर्शनमा सहभागी भएको प्रमाण समेत नभेटिएको भन्दै उनलाई छाडिएको हो । नेपाललाई पनि तीनकुने घटनाका घाइतेलाई भेट्ने क्रममै प्रहरीले चैत १५ गते राति नै पक्राउ गरेको थियो ।