कालिञ्चोक दर्शनको नाफा २९८% ले बढ्यो, रिजर्भको आकार पनि १६४.६६% ले वृद्धि

काठमाण्डौ । कालिञ्चोक दर्शन लिमिटेडको आम्दानी आएको सुधारका कारण नाफा वृद्धि भएको छ । कम्पनीले चालु आवको तेस्रो त्रैमाससम्म ५ करोड ६२ लाख रुपैयाँबराबर आम्दानी गरेको छ । कम्पनीले आर्जन गरेको यो रकम अघिल्लो आवको तुलनामा ९३.६८ प्रतिशतले बढी हो ।  

अघिल्लो आवको तेस्रो त्रैमाससम्म कम्पनीले २ करोड ९० लाख रुपैयाँ आम्दानी गरेको थियो ।  

आम्दानीमा आएको सुधारको प्रभाव कम्पनीको नाफामा देखिएको छ । कम्पनीको नाफा समीक्षा अवधिमा २९८.२४ प्रतिशतले बढेको छ । अघिल्लो आवमा ४७ लाख ४६ हजार रहेको कम्पनीको खुद नाफा १ करोड ८९ लाख रुपैयाँ पुगेको छ ।  

यो अवधिमा कम्पनीले ५ लाख ९४ हजार रुपैयाँबराबरको अन्य आम्दानी समेत गरेको छ । कम्पनीको कर्मचारी खर्च ९८ लाख ४५ हजार, हा्रसकट्टी खर्च १ करोड ८ लाख, अन्य खर्च ८८ लाख २१ हजार र वित्त खर्च ७३ लाख २२ हजार रहेको छ ।  

रिजर्भको आकार १६४.६६ प्रतिशतले बढ्दै २ करोड २७ लाख पुगेको छ ।  

समीक्षा अवधिमा कम्पनीको प्रतिसेयर आम्दानी(ईपीएस) बढेको छ । कम्पनीको ईपीएस १.५८ रुपैयाँबाट बढेर ४.२० रुपैयाँ पुगेको छ । यस्तै प्रतिसेयर नेटवर्थ १०३.८० रुपैयाँ, प्रतिसेयर कुल सम्पत्तिको मूल्य १३०.५८ रुपैया र चालु अनुपात २.१२ प्रतिशत कायम भएको छ ।