नेष्डो समृद्ध लघुवित्तको वित्तीय अवस्थामा उल्लेख्य सुधार, इपीएस नै ६३.९९ रुपैयाँ पुग्दा लाभांश क्षमता ५८.७६%

काठमाण्डौ । नेष्डो समृद्ध लघुुवित्त वित्तीय संस्थाको वित्तीय अवस्थामा सुधार देखिएको छ । चालु आवको दोस्रो त्रैमाससम्ममा संस्था ९ करोड ३२ लाख १६ हजार नाफा कमाउन सफल भएको छ ।

गत आवको सोही अवधिसम्म भने लघुवित्तले १३ करोड ५१ लाख ८७ हजार रुपैयाँ घाटा ब्यहोरेको थियो । संस्थाको खुद ब्याज आम्दानीमा देखिएको सुधारसँगै नेपाल राष्ट्र बैंकले लघुवित्त संस्थाहरुलाई ल्याएको कर्जा पुनर्संरचनाको व्यवस्थाले गर्दा यो संस्थाको वित्तीय अवस्था नै उल्लेख्य सुधारिएको छ ।

संस्थाले दोस्रो त्रैमाससम्म १४ करोड ७१ लाख ८४ हजार रुपैयाँ खुद ब्याज आम्दानी गरेको छ । यो आम्दानी गत आवको सोही अवधिसम्मको तुलनामा ८।४३ प्रतिशत बढी हो । गत आवको दोस्रो त्रैमाससम्म संस्थाले १३ करोड ५७ लाख ४१ हजार रुपैयाँ खुद ब्याज आम्दानी गरेको थियो ।

साथै सो अवधिसम्म संस्थाको इम्पेयरमेन्ट चार्ज ह्वात्तै घटेका कारण पनि नाफा बृद्धिमा टेवा पुगेको हो । गत आवको दोस्रो त्रैमाससम्म २७ करोड ७ लाख रुपैयाँ इम्पेयरमेन्ट चार्ज तिरेको यो संस्थाले चालु आवको यस अवधिसम्म आइपुग्दा ९०.४३ प्रतिशत घटाएर २ करोड ५९ लाख रुपैयाँ कायम गरेको छ ।

यता संस्थाको खराब कर्जा अनुपात (एनपीएल)भने सामान्य बढेको छ । गत आवको दोस्रो त्रैमाससम्म २०.९५ प्रतिशत रहेको एनपीएल यस अवधिसम्म बढेर २१.६० प्रतिशत पुगेको छ । साथै पूँजीकोष अनुपात १२.३१ प्रतिशतबाट बढेर १३.५० प्रतिशत, कस्ट अफ फण्ड ९.४८ प्रतिशत, सिडि रेसियो १६४.२२ प्रतिशत, बेस रेट १६.७१ प्रतिशत र स्प्रेड दर ४.५५ प्रतिशत पुगेको छ ।

संस्थाले सो अवधिसम्म २ अर्ब ४७ करोड ५२ लाख रुपैयाँ निक्षेप संकलन गरेको छ भने ३ अर्ब १ करोड ८ लाख रुपैयाँ कर्जा परिचालन गरेको छ ।

त्यस्तै, गत आवको दोस्रो त्रैमाससम्म १०६.०३ रुपैयाँ ऋणात्मक अवस्थामा रहेको प्रतिसेयर आम्दानी ९इपीएस० चालु आवको दोस्रो त्रैमाससम्म धनात्मक भई ६३.९९ रुपैयाँ पुगेको छ ।

यसका साथै मूल्य आम्दानी अनुपात २३.५५ गुणा, प्रतिसेयर नेटवर्थ २०४.९८ रुपैयाँ, तरलता अनुपात २२.७९ प्रतिशत रहेको छ ।

संस्थाले सो अवधिसम्म १७ करोड ११ लाख ९९ हजार रुपैयाँ वितरणयोग्य मुनाफा छुट्याएको छ । यसर्थ सो अवधिसम्म संस्थाको लाभांश क्षमता ५८.७६ प्रतिशत रहेको छ ।