फागुन २० को मध्यरातदेखि लामो तथा मध्यम दुरीका सवारी बन्द हुने

काठमाण्डौ । आसन्न निर्वाचनको सुरक्षालाई ध्यानमा राख्दै फागुन २० गते राति १२ बजेदेखि २१ गते साँझ ५ बजेसम्म अत्यावश्यकबाहेकका निजी तथा सार्वजनिक सवारीसाधन सञ्चालनमा रोक लगाइने भएको छ। निर्वाचन आयोगको निर्णयअनुसार उक्त अवधिमा लामो तथा मध्यम दुरीका रात्रि बसहरू सञ्चालन नहुने भएका हुन्।

नेपाल यातायात व्यवसायी राष्ट्रिय महासङ्घले आयोगको निर्देशनलाई पूर्ण रूपमा कार्यान्वयन गर्ने जनाएको छ। फागुन २० गते दिउँसो भने सवारी सञ्चालन सामान्य रहने जनाइएको छ। तर राति १२ बजेसम्म गन्तव्यमा पुग्न सक्ने रुटका बसहरू मात्र सञ्चालन हुने र त्यसपछि सबै रात्रि सेवा स्थगित गरिनेछ।

निर्वाचन अवधिभर एम्बुलेन्स, दमकल, शव वाहन, रक्तसञ्चार सेवा, सुरक्षा निकायका सवारीसाधन तथा विद्युत्, खानेपानी, ढल र दूरसञ्चार मर्मतसम्बन्धी सवारी भने निर्बाध रूपमा सञ्चालन हुनेछन्। सञ्चार गृहलगायत अन्य सवारीसाधनले आयोगबाट विशेष पास लिएर मात्र सञ्चालन अनुमति पाउने व्यवस्था गरिएको छ।