अमेरिकामा ट्वाइलेट पेपरको सङ्कटः २०२० जस्तै अभावको खतरा

काठमाण्डौ । अमेरिकामा ट्वाइलेट पेपरको आपूर्ति सङ्कटको जोखिम बढ्दै गएको छ। राष्ट्रपति डोनाल्ड ट्रम्पको नयाँ कर नीतिका कारण आयातमा लाग्ने कर वृद्धि भएपछि ट्वाइलेट पेपरको उत्पादनमा प्रयोग हुने कच्चा पदार्थको आपूर्ति प्रभावित भएको छ। यसले मूल्यवृद्धि र सन् २०२० को महामारीको समयमा जस्तै अभावको स्थिति निम्त्याउने चेतावनी विज्ञहरूले दिएका छन्।

ब्राजिलको प्रमुख पल्प निर्यातक कम्पनी सुजानो एसएले ट्रम्पको कर नीतिका कारण अमेरिकामा आफ्नो ब्लीच्ड हार्डवुड पल्पको निर्यात २०% ले घटेको जनाएको छ। यो पल्प ट्वाइलेट पेपर र अन्य स्वच्छता उत्पादनहरूको मुख्य कच्चा पदार्थ हो। सुजानोका सीईओ जोआओ अल्बर्टो डे अब्रेउले ब्लूमबर्ग न्यूजलाई भने, "कर वृद्धिका कारण हामीले अमेरिकी खरिदकर्ताहरूलाई बढेको लागत हस्तान्तरण गर्नुपरेको छ।"

ट्रम्प प्रशासनले चीनबाट आयात हुने सामानमा १४५% र ब्राजिलसहित अन्य देशहरूबाट आयात हुने सामानमा १०% कर लगाएको छ। यसले आपूर्ति शृङ्खलालाई प्रभावित गर्दै ट्वाइलेट पेपरको उत्पादन लागत बढाएको छ। अपोलो ग्लोबल म्यानेजमेन्टको एक प्रतिवेदनले २० देखि ४० दिनभित्र कन्टेनर जहाजहरू अमेरिकी बन्दरगाहमा पुग्ने र १ देखि १० दिनभित्र सामानहरू सहरहरूमा वितरण हुने अनुमान गरेको छ। तर, आपूर्तिमा अवरोधले यो समयसीमा प्रभावित हुन सक्छ।

विश्लेषकहरूले यो अवस्थाले सन् २०२० मा कोभिड-१९ को समयमा देखिएको ट्वाइलेट पेपरको अभावलाई सम्झाउने बताएका छन्। त्यतिबेला मानिसहरूले अत्यधिक खरिद र भण्डारण गर्दा अभाव भएको थियो। हालको अवस्थामा भने आपूर्ति शृङ्खलाको अवरोध मुख्य कारण हो। यद्यपि, केही विज्ञहरूले खाद्य र पेय पदार्थजस्ता आधारभूत सामग्रीहरू अमेरिकामै उत्पादन हुने भएकाले तिनको अभाव नहुने बताएका छन्।

ट्रम्प प्रशासनका केही अधिकारीहरूले समेत ट्वाइलेट पेपर, खाद्य सामग्री र अन्य घरायसी सामानहरूको भण्डारण शुरू गरेको समाचार बाहिरिएको छ। रोलिङ स्टोनको एक प्रतिवेदन अनुसार, एक ट्रम्प सहयोगीले भने, "यो नगर्नु मूर्खता हुनेछ!" उनले छोटोअ वधिको कठिनाइले दीर्घकालीन समृद्धि ल्याउने विश्वास व्यक्त गरे।

अर्थशास्त्रीहरूले ट्रम्पको करनीतिले उपभोक्ता मूल्यवृद्धि र सामानको अभाव निम्त्याउनसक्ने चेतावनी दिएका छन्।अपोलो ग्लोबल म्यानेजमेन्टका प्रमुख अर्थशास्त्रीले यो नीतिले गर्मी २०२५ सम्ममा सम्भवतः मन्दी निम्त्याउनसक्ने बताएका छन्।

हाललाई ट्वाइलेट पेपरको आपूर्ति उपलब्ध भए पनि आपूर्तिकर्ताहरूले सानो अवरोधले पनि अर्को खरिदको लहर निम्त्याउनसक्ने चेतावनी दिएका छन्। यो सङ्कटलाई समाधान गर्न ट्रम्प प्रशासनले चीनसँगको व्यापार वार्तालाई तीव्र बनाएको छ, तर तत्काल समाधानको सम्भावना कम देखिन्छ।