अनिल अंबानी र एस बैंकका संस्थापक राणा कपूरबीच ‘गुप्त डिल’ ! करोडौंको लेनदेनमा क्विड-प्रो-क्वोको खेल !

काठमाण्डौ । भारतको वित्तीय जगत फेरि हल्लिएको छ!

केन्द्रीय अनुसन्धान ब्युरो (CBI) ले उद्योगपति अनिल अंबानीको Reliance ADA Group र यस बैंकका सहसंस्थापक राणा कपूरबीच ‘क्विड–प्रो–क्वो’ (सौदाबाजीको सर्तमा भएको लेनदेन) भएको ठोस प्रमाण पाएको दाबी गर्दै चार्जशीट दायर गरेको छ।

CBI को अनुसन्धान अनुसार, अंबानी समूह र यस बैंकबीच पारस्परिक फाइदाका लागि रकम आदान–प्रदानको गोप्य सम्झौता भएको थियो। यस अन्तर्गत बैंकले अंबानी समूहका कम्पनीहरुलाई ठूलो ऋण सुविधा उपलब्ध गरायो भने बदलेमा Reliance Nippon Asset Management (RNAM) ले यस बैंकका पूँजी उपकरणहरूमा भारी लगानी गरेको भेटिएको छ।

कसरी भयो ‘डिल’ ?

CBI ले चार्जशीटमा उल्लेख गरेको छ कि सन् २०१७ मा RNMF (Reliance Nippon Mutual Fund) ले यस बैंकका AT–1 बन्डमा २,२५० करोड रुपैयाँ लगानी गर्‍यो।

त्यसपछि यस बैंकले अंबानी समूहका कम्पनीहरूको डेब्ट पेपर र एनसीडीहरू खरिद गरेर “तिमी मलाई सहयोग गर, म तिमीलाई गर्छु” भन्ने किसिमको आर्थिक सम्बन्ध बनाएको भेटिएको छ।

छोरा अनमोलको भूमिका पनि शंकास्पद

CBI का अनुसार, अनिल अंबानीका छोरा जय अनमोल अंबानीले RNAM को लगानी निर्णयमा प्रत्यक्ष प्रभाव पारेका थिए।

उनले बैंक र Reliance समूहबीच भएको लगानी सम्बन्धी छलफलमा पनि भूमिका खेलेको दाबी गरिएको छ।

CBI को भनाइ

CBI ले यस केसलाई ‘वित्तीय क्षेत्रको उच्चस्तरीय सिण्डिकेट’ को रुपमा व्याख्या गरेको छ।

संस्थाका अनुसार, यसरी पारस्परिक फाइदाका लागि गरिएको लगानी र ऋणको आदान–प्रदानले SEBI का नियमहरू उल्लंघन गरेको छ र भारतीय बैंकिङ प्रणालीको विश्वसनीयतामाथि प्रश्न उठाएको छ।

बजारमा प्रभाव र जनविश्वासको संकट

यो मुद्दा सार्वजनिक भएपछि भारतको वित्तीय बजारमा हलचल आएको छ। विश्लेषकहरु भन्छन्, यदि यी आरोप सिद्ध भए भने, यसले बैंकिङ प्रणाली र म्युचुअल फन्ड क्षेत्रको पारदर्शिता र विश्वसनीयतामा ठूलो आघात पुर्‍याउनेछ।

यस प्रकरणले भारतको ‘कॉरपोरेट-बैंकिंग गठजोड’ को वास्तविकता उजागर गरेको बताइन्छ।

-इकोनोमिक टाइम्सबाट भावानुवाद/बिजशाला