६७ लाख रुपैयाँबराबरको अवैध सुनसहित भारतीय नागरिक पक्राउ

काठमाण्डौ । अवैध सुनसहित एक भारतीय नागरिक पक्राउ परेका छन् । मकवानपुरको हेटौंडा उपमहानगरपालिका–१५ रातोमाटेबाट प्रहरीले ६७ लाख बराबरको अवैध सुनसहित एक भारतीय नागरिकलाई पक्राउ गरेको हो ।

पक्राउ पर्नेमा भारतका बिहार राज्य फुलबरिया पुर्वी चम्पारण बरेवा बसोवास गर्ने ३४ वर्षिय सुजित सर्राफ रहेका छन् । प्रहरीले उनलाई विरगंजबाट हेटौंडातर्फ आउँदै गरेको यात्रुबाहक ईभी माईक्रोमा चेकजाँच गर्दा पक्राउ गरेको हो । 

चेकजाँचका क्रममा प्रहरीले सर्राफको साथबाट ४ सय ९० ग्राम ८८० मिलिग्रामका बिलबिजक नभएको बिस्कुटको आकारको ४ टुक्रा, बिस्कुटको सानो १ टुक्रा र सिक्री १ थान बरामद गरेको थियो ।  

सर्राफबाट बरामद भएको सुनको बजार मूल्य ६७ लाख ३४ हजार ५ सय ४४ नेपाली रुपैयाँ रहेको प्रहरीले जनाएको छ । सर्राफलाई पक्राउ गरी थप अनुसन्धान भईरहेको प्रहरीले जनाएको छ ।