बिट्क्वाइनको मूल्यमा उच्च गिरावट

काठमाण्डौ । विश्वको सबैभन्दा ठूलो क्रिप्टोकरेन्सी,‘बिट्क्वाइन’को मूल्यमा सोमबार उच्च गिरावट आएको छ । अमेरिकी राष्ट्रपति डोनाल्ड ट्रम्पले ‘रणनीतिक बिट्क्वाइन रिजर्भ’ स्थापना गर्ने कार्यकारी आदेशमा हस्ताक्षर गरेसँगै बिट्क्वाइनको मूल्य ५ प्रतिशतभन्दा बढीले घटेको हो ।

यो गिरावटसँगै बिट्क्वाइनको मूल्य ८१ हजार ७१२ डलरमा कारोबार भईरहेको छ । यस्तै आज अन्य क्रिप्टोकरेन्सीको मूल्य पनि घटेको छ । आज इथर र एक्सआरपीको मूल्य पनि करिब ७.५ प्रतिशतले घटेको छ ।

केही लगानीकर्ताले ट्रम्पको बिट्क्वाइन रिजर्भका कारण बिट्क्वाइनको मूल्य दीर्घकालका लागि बुलिस रहने बताएका छन् ।

ट्रम्पले गत बिहिबार ह्वाइट हाउसमा कार्यकारी आदेशमार्फत बिट्क्वाइन रिजर्भको स्थापना गरेका थिए । ट्रेजरी डिपार्टमेन्टले रिजर्भको व्यवस्थापन गर्न एउटा कार्यालय स्थापना गर्नेछ । जसलाई अमेरिकी सरकारले आपराधिक वा नागरिक सम्पत्ति जफत प्रक्रियाको एक भागको रूपमा जफत गरेको बिट्क्वाइनसँग पूँजीकरण गर्नेछ ।