चार दिनपछि नेप्सेमा सुधार, कारोबार समेत बढ्यो

काठमाण्डौ । साताको अन्तिम कारोबार दिन आज नेपाल स्टक एक्सचेञ्च (नेप्से) मा सामान्य अंकको सुधार आएको छ । आज नेप्से परिसूचक ०.०७ प्रतिशत अर्थात २.०८ अंकले बढेर २ हजार ६५८.०२ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२७ प्रतिशतले बढेर ४४७.२६ विन्दुमा सीमित बनेको छ । यो दिन नेप्सेमा सूचीकृत मध्ये ३०८ वटा स्क्रिप्टको १ करोड ९७ लाख ५४ हजार २४५ कित्ता सेयर ७ अर्ब ८७ करोड ९३ लाख रुपैयाँभन्दा बढीको कारोबार भएको  छ ।

अघिल्लो दिन बजारमा ७  अर्ब ५७ करोड बढीको कारोबार भएको थियो ।  

आजको बजारबारे नेपाल सेयरधनी संघका उपाध्यक्ष कमलराज अधिकारी भन्छन्,  ‘गभर्नर नियुक्तीमा ढिलाई हुँदा लगानीकर्ताको मनोलब घटेको छ । यही कारण बजारमा राम्रो सुधार आएको छैन ।’

यद्यपी आगामी सातासम्म गभर्नर नियुक्त हुने र बजारले राम्रो गति लिनेमा उनी ढुक्क देखिए । पछिल्लो समयको बजारको घटाईलाई लगानीकर्ताले अवसरको रुपमा लिएको समेत उनले बताए ।  

अर्का बजार जानकार पर्वत विष्टले पनि सरकारका केही मन्त्रीहरु हट्नु तथा हटाइनु, राष्ट्र बैंकको गभर्नर नियुक्तिमा ढिलाई हुनु र सडकमा विभिन्न पेशाकर्मीको आन्दोलनका कारण बजारले गति लिन नसकेको बताए ।  

यो दिन नेप्सेमा सूचीकृत १३ वटा समूहमध्ये ४ वटा बाहेक अन्य सबैमा रातो पोतियो। आज लगानी समूहमा सर्वाधिक उछाल आयो । यो समूह आज २.३२ प्रतिशतले बढ्यो ।  

यस्तै आज व्यापार समूह २.१० प्रतिशत,हाईड्रो ०.२०,लगानी २.३२ र म्युचुअल फण्ड ०.३० प्रतिशतले बढ्यो ।  

होटल समूह आज सर्वाधिक अर्थात ०.९६ प्रतिशतले घट्यो । बैंकिङ समूह पनि ०.१३ प्रतिशत, विकास बैंक ०.९०,फाइनान्स ०.९५,जीवन बीम ०.४२, उत्पादन तथा प्रशोधन ०.१४, लघुवित्त ०.४२,निर्जीवन बीमा ०.३० र अन्य समूह ०.११ प्रतिशतले घट्यो ।  

धेरै कारोबार गर्ने कम्पनीहरु

यो दिन ङादी ग्रुप पावरको सर्वाधिक सेयर कारोबार भयो । आज यो कम्पनीको ७० करोड ३४ लाख बढीको कारोबार भयो । राधी विद्युत कम्पनीको पनि आज ५७ करोड २३ लाख, एनआरएन इन्फ्रास्ट्रक्चरको ५२ करोड ५२ लाख, युनिभर्सल पावरको ४७  करोड ३ लाख र एचआईडीसीएलको २८ करोड २८ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज नेपाल माइक्रो इन्स्योरेन्स र क्रेष्ट माइक्रो इन्स्योरेन्सको सेयरमूल्यमा अपर सर्किट लाग्यो ।  

यस्तै महुली लघुवित्तको सेयरमूल्य ७.२० प्रतिशत,ङादी ग्रुप पावरको ७.१० र एनआरएन इन्फ्रास्ट्रक्चरको ७.०१ प्रतिशतले बढ्यो ।  

नेपाल हाईड्रो डेभलपर्सको सेयरमूल्य आज सर्वाधिक घट्यो । यो कम्पनीको सेयरमूल्य आज ६.८८ प्रतिशतले घट्यो । गुराँस लघुवित्तको सेयरमूल्य पनि आज ५.४१ प्रतिशत र सिन्धु विकास बैंकको सेयरमूल्य ५.३४ प्रतिशतले घट्यो ।