नेप्से झिनो अंकले बढ्यो, कारोबारमा समेत सुधार

काठमाण्डौ । साताको पहिलो कारोबार दिन आज नेपाल स्टक एक्सचेञ्च(नेप्से) झिनो अंकले बढेको छ । आज नेप्से परिसूचक ०.१३ प्रतिशत अर्थात ३.५८ अंकले बढेर २ हजार ६६१.६० विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.४० प्रतिशतले बढेर ४४९.०८ विन्दुमा पुगेको छ । यो दिन नेप्सेमा सूचीकृत मध्ये ३१४ वटा स्क्रिप्टको २ करोड ८४ लाख ३८ हजार ४२८ कित्ता सेयर १० अर्ब ८७ करोड ५९ लाख रुपैयाँभन्दा बढीको कारोबार भएको  छ ।

आजको कारोबार गत बिहिबारको तुलनामा बढी हो । गत बिहिबार ७ अर्ब ८७ करोड बढीको कारोबार भएको थियो ।  

आजको बजारबारे अर्थशास्त्री सूर्यनारायण पौडेल भन्छन्,  ‘यतिबेला लगानीकर्ता गभर्नर नियुक्तिको प्रतिक्षामा छन् । उनीहरु पर्ख र हेरको रणनीति रहेको अवस्था छ । आजको बजारलाई नियाल्दा भने बजारमा कारोबारीको प्रवेश भएको देखिन्छ ।’

गभर्नर नियुक्तिको टुङ्गो लागेपछि भने बजारले गति लिनेमा उनी ढुक्क देखिए ।  

नेपाल सेयरधनी संघका अध्यक्ष घनश्याम पाण्डेले सत्ता पक्षका शीर्ष नेताहरुबीचको भेटघाटले सरकारको आयुसम्बन्धी अन्यौलता हटेको छ । आज परिसूचकसँगसँगै कारोबार पनि बढेका कारण बजारले माथिको यात्रा गर्न सक्छ ।’

उनले यो बेला सेयर बजारमा लगानीको सिजनपनि भएकाले पनि बजार अब माथिनै जाने बताए ।    

यो दिन नेप्सेमा सूचीकृत १३ वटा समूहमध्ये ७ वटा समूह बढ्यो भने अन्य ६ वटा समूहमा रातो पोतियो । आज लगानी समूहमा सर्वाधिक वृद्धि देखियो । यो समूह आज १.८७ प्रतिशतले बढ्यो ।  

यस्तै आज होटल समूह ०.७१ प्रतिशत,हाईड्रो १.०७, जीवन बीमा ०.३६,उत्पादन तथा प्रशोधन ०.५२,म्युचुअल फण्ड ०.२८ र व्यापार समूह ०.९६ प्रतिशतले बढ्यो ।  

फाइनान्स समूह आज सर्वाधिक घट्यो । यो समूह आज ०.८५ प्रतिशतले ओराला लाग्यो । बैंकिङ समूह पनि आज ०.२६ प्रतिशत,विकास बैंक ०.४५, लघुवित्त ०.७१, निर्जीवन बीमा ०.०१ र अन्य समूह ०.७३ प्रतिशतले घट्यो ।  

धेरै कारोबार गर्ने कम्पनीहरु

यो दिन ङादी ग्रुप पावरको सर्वाधिक सेयर कारोबार भयो । आज यो कम्पनीको ८६ करोड १७ लाख बढीको कारोबार भयो । एनआरएन इन्फ्रास्ट्रक्चरको पनि ५६ करोड ३८ लाख, राधी विद्युत कम्पनीको ५६ करोड २० लाख र एचआईडीसीएलको ५२ करोड ७४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा मात्रै अपर सर्किट लाग्यो । आज नेपाल माइक्रो इन्स्योरेन्स र क्रेष्ट माइक्रो लाइफको सेयरमूल्यमा अपर सर्किट लाग्यो । ङादी ग्रुप पावरको सेयरमूल्य पनि आज ७.६५ प्रतिशत,सुपर माई हाईड्रोपावरको ७.१३ र अरुण भ्याली हाईड्रोको सेयरमूल्य ७.०७ प्रतिशतले बढ्यो ।  

विन नेपाल लघुवित्तको सेयरमूल्य आज सर्वाधिक अर्थात १० प्रतिशतले घट्यो। नारायणी डेभलपमेन्ट बैंकको सेयरमूल्य पनि आज ५.५० प्रतिशत, अपर सोलु हाईड्रो इलेक्ट्रिकको ४.९७ र गुराँस लघुवित्तको सेयरमूल्य ३.७४ प्रतिशतले घट्यो।