प्रतिनिधिसभा निर्वाचनका लागि २ लाख २१ हजार कर्मचारी खटाइने

काठमाण्डौ । आगामी फागुन २१ गते हुने प्रतिनिधिसभा सदस्य निर्वाचनका लागि देशभर २ लाख २१ हजार कर्मचारी परिचालन गरिने भएको छ। ७७ जिल्लाका १६५ निर्वाचन क्षेत्रमा रहेका २३ हजार ११२ मतदान केन्द्र तथा समानुपातिकतर्फ मात्र मतदान हुने १४३ अस्थायी मतदान केन्द्रमा उक्त संख्यामा कर्मचारी खटाइने व्यवस्था मिलाइएको हो।

आयोगका अनुसार ५०० भन्दा बढी मतदाता रहेका मतदान केन्द्रमा ९ जना र ५०० भन्दा कम मतदाता भएका केन्द्रमा आठ जना कर्मचारी खटाइनेछन्। मतदान कार्यलाई व्यवस्थित र प्रभावकारी बनाउन आवश्यक जनशक्ति व्यवस्थापन गरिएको आयोगले जनाएको छ।

आयोगका अनुसार मतदान केन्द्रमा खटिने मतदान अधिकृत र सहायक मतदान अधिकृतलाई पूर्वप्रशिक्षण प्रदान गरिनेछ। उनीहरूलाई प्रशिक्षण दिएपछि सम्बन्धित केन्द्रमा खटिने अन्य कर्मचारीलाई मतदान अधिकृतले नै तालिम दिने व्यवस्था मिलाइएको छ।

यसैबीच, निर्वाचन प्रयोजनका सामग्री तथा मतपत्र देशभरका १६५ वटै निर्वाचन क्षेत्रमा बिहीबारसम्म पठाइसकिएको आयोगले जनाएको छ। आयोगले निर्वाचनलाई निष्पक्ष, पारदर्शी र शान्तिपूर्ण रूपमा सम्पन्न गराउन सम्पूर्ण तयारी पूरा भएको दाबी गरेको छ।