काठमाण्डौ । बुधबार गृहमन्त्री ओमप्रकाश अर्यालको अध्यक्षतामा बसेको केन्द्रीय सुरक्षा समितिको बैठकले भोलि हुने प्रतिनिधिसभा सदस्य निर्वाचनका लागि सम्पूर्ण सुरक्षा तयारी पूर्ण भएको निष्कर्ष निकालेको छ।
बैठकमा सबै सुरक्षा निकायबाट निर्वाचन तयारीका सम्बन्धमा विस्तृत ब्रिफिङ लिइएको थियो। बैठकले संवेदनशील क्षेत्रमा हेलिकप्टरबाट पेट्रोलिङ गर्ने, निर्वाचन विरोधी गतिविधि रोकथाम गर्न सम्भावित सूचना संकलन गर्ने, र कानून विपरित गतिविधि भए तुरुन्त कारबाही गर्ने निर्णय गरेको छ।
बैठकले मतदातालाई भोलि हुने निर्वाचनमा ढुक्क भएर मतदानमा सहभागी हुन आह्वान गर्दै सुरक्षा व्यवस्थापन चुस्त र दुरुस्त रहेको बताएको छ।
बैठकमा गृहमन्त्री अर्यालसहित गृह सचिव राजकुमार श्रेष्ठ, रक्षा मन्त्रालयका सचिव केदारनाथ शर्मा, सुरक्षा निकायका प्रमुखहरू र गृह मन्त्रालयका उच्च अधिकारीहरूको सहभागिता रहेको थियो।

