अभावको मौका छोपी कालोबजारी: श्रीराम ग्यास उद्योगले ६ हजारभन्दा बढी सिलिन्डर लुकाएको फेला

काठमाण्डौ । बजारमा खाना पकाउने ग्यासको अभाव चर्किँदै जाँदा उपभोक्ताहरूले घण्टौं लाइन बसेर पनि ग्यास नपाउने अवस्था सिर्जना भएको छ। यस्तै अभावको मौका छोपी कालोबजारी गर्ने क्रम बढ्दै गएको छ। यसै क्रममा वाणिज्य आपूर्ति तथा उपभोक्ता संरक्षण विभागको अनुगमन टोलीले ठूलो मात्रामा ग्यास सिलिन्डर लुकाएर राखेको फेला पारेको छ।

ललितपुरको हरिसिद्धिमा रहेको श्रीराम ग्यास उद्योगले ६ हजारभन्दा बढी ग्यास सिलिन्डर गोप्य रूपमा लुकाएर राखेको पाइएको छ। भारतबाट नियमित आपूर्ति भइरहे पनि बजारमा अभाव देखाउन र कालोबजारी गर्न यस्तो कार्य गरिएको विभागको अनुमान छ। विभाग र नेपाल आयल निगमको संयुक्त टोलीले सोमबार गरेको छापामार अनुगमनमा यो तथ्य बाहिर आएको हो।

उपभोक्तालाई ग्यास नदिएर स्टकमा राखेर कालोबजारी गर्ने उद्योगलाई विभागले ३ लाख रुपैयाँ जरिवाना तोकेको छ। अभावको समयमा यस्ता गतिविधिले सर्वसाधारणको भान्सामा प्रत्यक्ष असर परिरहेको छ भने कालोबजारी गर्नेहरूले अवैध नाफा कमाइरहेका छन्।

यसैगरी विभागले अन्य केही स्टोरहरूलाई पनि कारबाही गरेको छ। बडि मालिका खाद्यान्न भण्डारलाई १५ हजार रुपैयाँ र दुवाडी स्टोर एण्ड मल्टी ट्रेडलाई ५ हजार रुपैयाँ जरिवाना लगाइएको छ। अन्य १८ वटा खाद्य तथा किराना पसलहरूलाई भने चेतावनी दिइएको छ।

अभाव र कालोबजारीको यो शृंखला रोक्न विभागले बजार अनुगमनलाई अझ कडा बनाउने बताए पनि उपभोक्ताहरूले भने यस्ता घटनाले नियमन निकायको प्रभावकारिता माथि प्रश्न उठाइरहेका छन्। अभावको बेला यस्ता कालोबजारी रोक्न सरकारी निकायहरूको सक्रियता बढाउनुपर्ने आवश्यकता देखिएको छ।