साताको अन्तिम कारोबार दिन सामान्य अंकले बढ्यो सेयरबजार, कारोबार झण्डै साढे ७ अर्ब

काठमाण्डौ । साताको अन्तिम कारोबार दिन आज सेयरबजार सामान्य अंकले बढेको छ । आज नेपाल स्टक एक्सचेञ्ज (नेप्से)परिसूचक ०.१८ प्रतिशत अर्थात् ५.३६ अंकले बढेर  २ हजार ८३८ विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स भने ०.१२ प्रतिशतले घटेर ४७६.८७ विन्दुमा झरेको छ।

आज नेप्सेमा सूचीकृत ३३५ वटा स्क्रिप्टका १ करोड ८० लाख ६३ हजार ७२८ कित्ता सेयर किनबेच हुँदा कुल कारोबार रकम ७ अर्ब ४६ करोड ६ लाख रुपैयाँभन्दा बढी पुगेको छ।  

आजको बजारबारे नेपाल इन्भेष्टर्स फोरमा उपाध्यक्ष राजन लम्साल भन्छन्, ‘आज बजारमा सामान्य सुधार देखिएको छ, तर अपेक्षा गरेअनुसारको भोल्युम भने बजारमा छैन । बजारसँगै कारोबार पनि बढ्नलाई आधारहरु तय भएपनि यतिबेला लगानीकर्ताहरु झ्याप्पै लगानी पनि गर्न सकिरहेका छैनन् । विशेषगरी यतिबेला लगानीकर्ताहरु तेस्रो त्रैमासिक रिर्पोटको प्रतिक्षामा छन् । तेस्रो त्रैमासिक रिर्पोटले वर्षभरीको अवस्था डिटरमाइन गर्ने हुँदा सेयर बेच्न वा किन्नकै लागि पनि लगानीकर्ताहरु बैंक वित्तीय संस्था वा अन्य कम्पनीका रिर्पोटको प्रतिक्षामा छन् । सम्भवः ७ गते बैंक वित्तीय संस्थाको रिर्पोट आउनेछ र त्यसैले नै बजार कता जान्छ भन्ने निधो गर्नेछ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये ५ वटामा हरियाली छायो भने ८ वटामा रातो पोतियो । आज उत्पादन तथा प्रशोधन समूह सर्वाधिक अर्थात १.४० प्रतिशतले बढ््यो । यस्तै होटल समूह १.३८ प्रतिशत, हाईड्रो ०.६७, अन्य ०.५६ र व्यापार ०.०३ प्रतिशतले बढ्यो ।  

आज निर्जीवन बीमा समूह सर्वाधिक अर्थात ०.५१ प्रतिशतले घट्यो । यसैगरी बैंकिङ समूह ०.२७ प्रतिशत, विकास बैंक ०.३८, फाइनान्स ०.३२, लगानी ०.०९, जीवन बीमा ०.०७, लघुवित्त ०.३३, म्युचुअल फण्ड ०.१३ र निर्जीवन बीमा ०.५१ प्रतिशतले घट्यो ।  

सर्वाधिक कारोबार हुने कम्पनी

आज नेशनल हाईड्रोपावरको सर्वाधिक अर्थात ६६ करोड ८६ लाख रुपैयाँभन्दा बढीको सेयर कारोबार भएको छ।

त्यसैगरी सोलु हाईड्रोको ३७ करोड २६ लाख, रिडी पावरको ३४ करोड २ लाख र रिलायन्स स्पीनिङ मिल्सको ३२ करोड ९५ लाख बढीको सेयर कारोबार भएको छ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरूमध्ये ६ वटा कम्पनीको सेयरमूल्यमा सकारात्मक सर्किट लागेको छ। आज रिजलाइन इनर्जी, सूर्यकुण्ड हाईड्रो, होटल फरेष्ट इन, पाल्पा सिमेन्ट, शिखर पावर डेभलपमेन्ट ् रिज लाइनको सेयरमूल्यमा अपर सर्किट लाग्यो ।  

यस्तै खानीखोला हाईड्रोको सेयरमूल्य ८.३३ प्रतिशत, रिलायन्स स्पीनिङ मिल्सको सोलु हाईड्रोको सेयरमूल्य ४.५४ प्रतिशतले बढ्यो ।    

एशियन हाईड्रोको सेयरमूल्य आज सर्वाधिक अर्थात ४.५४ प्रतिशतले घट्यो ।