नरेन्द्र मोदीले उद्घाटन गर्नु एकदिन अघि रिफाइनरीमा आगलागी

काठमाण्डौ । राजस्थानको बाडमेर जिल्लास्थित पचपदरा रिफाइनरी परिसरमा आगलागी भएको छ। घटनापछि रिफाइनरी क्षेत्रमाथि ठूलो मात्रामा धुवाँको गुबार देखिएको भारतीय स्थानीय सञ्चार माध्यमहरूले जनाएका छन्।

यो रिफाइनरी भोलि, अर्थात् मंगलबार, भारतका प्रधानमन्त्री नरेन्द्र मोदीद्वारा उद्घाटन हुने कार्यक्रम तय गरिएको थियो। उद्घाटनको तयारीस्वरूप ठूलो संख्यामा मानिसहरूको सहभागिता हुने अपेक्षा गरिएको अवस्थामा यो घटना भएको हो।

पूर्व मुख्यमन्त्री अशोक गहलोतले घटनाप्रति चिन्ता व्यक्त गर्दै यसलाई दुर्भाग्यपूर्ण बताएका छन्। सामाजिक सञ्जालमार्फत उनले रिफाइनरी राजस्थानका लागि गौरवको आयोजना भएको उल्लेख गर्दै सबैको सुरक्षाका लागि प्रार्थना गरेका छन्।

यता, विपक्षी नेता टीकाराम जुलीले घटनालाई लिएर राज्य सरकारको व्यवस्थापन र तयारीमाथि प्रश्न उठाएका छन्। उनले रिफाइनरी निर्माण तथा उद्घाटन प्रक्रियामा भएको ढिलाइ र हतारको तयारीले यस्ता घटनामा भूमिका हुन सक्ने टिप्पणी गरेका छन्।

हालसम्म आगलागीको कारणबारे आधिकारिक पुष्टि भएको छैन। सम्बन्धित निकायहरूले घटनाको अनुसन्धान गरिरहेको र क्षतिको विवरण संकलन भइरहेको  जनाइएको छ ।